Preso hartu dituzte asteburuko talde bortxaketagatik atxilotuetako bi

Hirugarren akusatua aske da, karguekin. Kalera irten da jendea Bilbon erasoaren aurka egiteko

Asteburuan bahitu eta bortxatu duten andrearen kasua salatzeko elkarretatzea, atzo. MONIKA DEL VALLE / FOKU.
Uxue Gutierrez Lorenzo.
Bilbo
2019ko irailaren 25a
00:00
Entzun
Bilboko seigarren instrukzio epaitegiak bi gizon kartzelan sartu ditu, joan den asteburuan emakume bat bahitzea eta hari sexu erasoa egitea egotzita. Emakumeak berak jarri zuen salaketa joan den igandean, eta atzo deklaratu zuten epailearen aurrean hiru gizonezkok, erasoarekin lotura zutelakoan. Horietatik bi bidali ditu kartzelara epaileak. Hirugarrena, berriz, aske utzi du, karguekin. Egunero epaitegian aurkeztu beharko du. Urruntze agindua eta andrazkoarekin komunikatzeko debekua ere ezarri die epaileak hiru akusatuei.

Ertzaintzak jakinarazi duenez, eta andrazkoak berak deklaratu zuenez, ostegunetik igandera bitarte izan zuten atxikia emakumea Bilboko Atxuri auzoko etxebizitza batean. Igande arratsaldean jarri zuen salaketa biktimak, eta bahituta eduki zuten egunetan hainbatetan bortxatu zutela adierazi zuen. Deklarazioa jaso ondotik, lehen-lehenik, 33 eta 36 urte bitarteko lau gizon atxilotu zituzten, erasoarekin zerikusia izan zezaketelakoan. Bat egun berean utzi zuten aske, erasoarekin lotuko zuen nahiko zantzurik ez zelako.

Deklaratu ondotik, emakumea Basurtuko ospitalera eraman zuten artatzera. El Correo egunkariak zabaldu duenaren arabera, emakumeak bortxaketa pairatu izanaren zantzuak ditu, auzitegiko medikuak egindako txostenak baieztatu duenez. Hortaz, «bat datoz» andreak egindako deklarazioa eta azterketa medikoa. 25 urte ditu biktimak.

Erasoaren berri izan eta berehala egin zuen mugimendu feministak protestarako deia. Kalamiak Alde Zaharreko talde feministak antolatuta, atzo arratsean egin zuten erasoa salatzeko bilkura, Bilboko San Anton zubian.

Biktimari babesa erakusteko eta euren haserre mezua ozentzeko baliatu zuten deialdia. «Beste behin ere, emakumeen aurkako indarkeria, indarkeria matxista, gure auzoko kaleetan. Aski da! Nazkatuta gaude!». Era berean, erasoa sistema oso baten barruan ulertu beharreko ekintza dela nabarmendu eta eraso matxistak «egiturazko arazoa» direla ohartarazi zuten mugimendu feministako kideek. «Eraso hauek ez dira gertakari bakanak; hau egiturazko arazoa da, emakume guztiok emakume izate hutsagatik pairatzen duguna gizarte kapitalista heteropatriarkal honetan». Bukatzeko, erantzuna antolatzeko deia ere egin zuten: «Erasoen aurrean autodefentsa feministaz erantzungo dugu».

Bilboko Udalak eta Bizkaiko Batzar Nagusiek ere arbuiatu dute erasoa. Mugimendu feministaren deialdiarekin bat egin dute bi instituzioetako ordezkariek.

Antzeko eraso gehiago

Denbora gutxian Bilbon salatutako taldeko bigarren sexu erasoa da. Abuztuaren 2an, Ertzaintzak sei gizonezko atxilotu zituen, Etxebarria parkean emakume bati sexu erasoa egitea egotzita. Ospitalera eraman behar izan zuten andrea. Atxilotuetako bi kartzelara bidali zituzten, eta karguekin aske utzi zituzten besteak, baldintzapean. Hain justu, haiek bilatzeko agindua emana dute, agindutako egunetan ez zirelako epaitegira joan.

Beste bahiketa bat ere izan zen Bilbon abuztuan: hilaren 30ean 37 urteko gizon bat atzeman zuten, sei egunez bikotekide ohia etxean atxiki, jo, iraindu eta bortxatzea leporatuta. Bi urruntze agindua zituen gizonak. Behin-behinean espetxeratu egin zuten.
Iruzkinak
Ez dago iruzkinik

Ordenatu
0/500
Interesgarria izango zaizu
Nabarmenduak
Orain, aldi berria dator. Zure aldia. 2025erako 3.000 babesle berri behar ditugu iragana eta geroa orainaldian kontatzeko.