Albistea entzun

Argitara atera dira irakurmen probako emaitza «irregularrak»

Hegoaldean nabarmen egin dute behera PISA probako irakurmeneko datuek. OCDEk ikasle batzuen jarrerari egotzi dio beherakada
Ikasle batzuk azterketa bat egiten, Donostiako Axular lizeoan.
Ikasle batzuk azterketa bat egiten, Donostiako Axular lizeoan. GORKA RUBIO / FOKU Tamaina handiagoan ikusi

Amaia Ramirez de Okariz Kortabarria -

2020ko uztailak 24 - Gasteiz

Irakurmen probako emaitza «irregularrak» argitara atera ditu OCDE Ekonomia Lankidetza eta Garapenerako Erakundeak, 2018ko PISA azterketa oinarri hartuta. Hain zuzen, iazko abenduaren hasieran ziren emaitza guztiak argitaratzekoak, baina, azkenean, Hego Euskal Herrian eta Espainiako Estatuan soilik zientzietakoak eta matematiketakoak jakinarazi zituzten. Izan ere, OCDEren arabera, ikasle kopuru batek ez zuen proba «behar besteko seriotasunarekin» egin. Jasotako datuei dagokienez, beherakada nabaria da irakurmenaren alorrean. Araba, Bizkai eta Gipuzkoan 475 puntu atera dituzte ikasleek, 2015ean baino hamasei puntu gutxiago (491). Nafarroan ere behera egin dute emaitzek: 472 puntu atera dituzte azken proban, orain dela bost urte baino 42 gutxiago (514). Datu horiek OCDE eta Europako Batasuneko batez bestekoen azpitik daude (487 eta 489, hurrenez hurren).

Guztira, 79 herrialdetako 15 eta 16 urteko 600.000 ikaslek egiten duten proba da. Hegoaldean, hiru urtean behin egiten da, Derrigorrezko Bigarren Hezkuntzako laugarren mailan dauden ikasleekin, eta hiru arlo aztertzen ditu: zientziak, matematika eta irakurmena. Ipar Euskal Herrian ere egiten dute proba, eta Frantziako Estatuko emaitzetan sartzen dituzte. Kasu honetan, Hego Euskal Herriko 5.463 ikaslek hartu zuten parte. OCDEk ez du jakinarazi zehazki non egon ziren arazoak, baina ez dago gustura ikasle batzuen ustezko jarrerarekin. Batetik, erakundeak uste du eskola batzuek aurreratu egin zituztela ikasturte amaierako azterketak, eta, beraz, ikasle batzuek ez zutela egoera hori ongi asumitu: «Ez zuten ahal bezain ongi egin beren eraginkortasuna frogatzeko». Bestetik, erantsi du ikasle batzuek «presaka eta ausaz» eman zituztela ordenagailuz egin beharreko galderen erantzunak: «Hainbat ikaslek 25 segundoan erantzun zituzten hogei galdera».

Nafarroako Gobernuko Hezkuntza Departamentuak emaitzen balorazio bat egin du. Hain zuzen, PISAko probak apirilean eta maiatzean egin ohi dira, eta gobernuak uste du «lotura nabarmena» dagoela data horien eta autonomia erkidego bakoitzeko ezohiko ebaluazioen artean: «Errekuperazio azterketak ekainean egiten diren autonomia erkidegoetan, hala nola Nafarroan, espero baino puntuazio txikiagoak lortu dira ezohiko ebaluazioak irailean egiten direnetan baino».

Are gehiago, Nafarroako Gobernuak gehitu du emaitzak ikasleen «motibazio faltaren ondorio» ere badirela, eta hezkuntza sisteman ere nolabait «gogaitze» sentsazioa atzeman dela, «lau eskoletan boikota egiteraino». Eusko Jaurlaritzako Hezkuntza Sailak, berriz, oraindik ez du egin balorazio ofizialik.

Zientzia eta matematika

Zientzietako eta matematiketako proben emaitzak abenduan jakinarazi zituzten. Zientzietan, 487 puntu atera zituzten EAEn, 2015. urtean baino lau puntu gehiago (483). Nafarroan, ordea, behera egin zuten datuek: 512tik 492ra. Matematiketan ere, joera berbera errepikatu zen. EAEko ikasleek azken datuei eutsi, eta pixka bat igotzea lortu zuten: 499 puntu izan zituzten, aurrekoan baino zazpi gehiago (492). Baina Nafarroako ikasleek arlo honetan ere behera egin zuten: 518 puntutik 503 puntura, zehazki.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

 ©BERRIA

«Berriz indarkeria aipatzeak ez du auzitan jartzen onespena»

Arantxa Iraola

Ortubairentzat, argi esan behar da 'soilik baietz da baietz' legeak zigorrak delitu bakanetan urritzen dituela; asmo txarrez hauspotutako gatazka bat dela. Behin legea aldatzen hasita, ordea, egokitzat du PSOEren hautua.

Nerea Barjola ekintzaile feminista Eusko Legebiltzarrean, atzo. ©EUSKO LEGEBILTZARRA

Iruditeria aldatzeko beharra

Isabel Jaurena

Nerea Barjolak dio krisi zentroak gakoa direla indarkeria sexualaren biktimak artatzeko. Gunearen eta gainerako zerbitzuen «koordinazioa» ezinbertzekoa da emakumeak ahal bezain ongi laguntzeko
1936ko gerran Bastidan (Araba) hildako biktimen omenezko ekitaldi bat, artxiboko irudi batean. ©ENDIKA PORTILLO/ FOKU

Frankismoaren biktimei erreparazio «osoa» emango die memoriaren legeak

Edurne Begiristain

EP-IUk, EAJk eta PSE-EEk akordioa lortu dute memoria historikoaren legearen gainean. Biktima gisa izendatua izateko kasuistika zabaltzea adostu dute

 ©NAFARROAKO GOBERNUA / BERRIA

Belateko tuneleko lanak lizitatu dituzte, 2028an bukatzea helburu

Ion Orzaiz - Paulo Ostolaza

Nafarroako Gobernuak esan du lanek 95 milioi euroko kostua izanen dutela. Tunelak Europako legedira egokituko dituzte, hogei urte berandu

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Iruzkinak kargatzen...

Izan BERRIAlaguna

Zure babes ekonomikoa ezinbestekoa zaigu euskarazko kazetaritza independente eta kalitatezkoa egiten segitzeko.