80 eguneko okupazioaren ondotik, erantzuna eman dio Arbonako (Lapurdi) lurren jabeak SAFER laborantza lurrak kudeatzen dituen egiturari. ELB laborarien sindikatuak eta Lurzaindia elkarteak atzo arratsean jakinarazi zuten. Salmenta geldiaraztea lortu dute: erosle gaia erretiratu egin da prozesutik. Hala eta guztiz ere, jabeak ez du onartu SAFER egituraren lehentasunez erosteko galdea. Oraingoz, beraz, Lurzaindiak eta ELBk SAFERarekin eta jabearekin negoziatzen segituko dute. Izan ere, jabeak proposatu dio SAFER egiturari ondasun guziak hark ezarritako prezioan erosteko. Negoziazioak iraunen duen bitartean, okupazioari eutsiko diote, «indar harremanarekin segitzeko».
Berria pozez hartu zuten atzo arratsean bertaratu ziren ehunka lagunek. Dominique AmeztoiELBko kideak nabarmendu zuen «herri proiektua» dela Arbonakoa. Hala, herritarrei dei egin zien segidari buruzko proposamenak egiteko. Gainera, Euskal Hirigune Elkargoa negoziazio prozesura batzea «lorpentzat» jo dute ELBk eta Lurzaindiak, eta hautetsiekin batera lurraren kudeaketari buruzko hausnarketak eginen dituztela erran dute.
Duela zenbait hilabete, Lurzaindia elkarteak jakin zuen Arbonako laborantza lur batzuk salmentan ezarri zituela jabeak; hamabost bat hektarea lur eta hiru etxebizitza: nagusi bat eta ondoko bi bazter bastiza. Ondasuna hiru milioi eurotan erostekotan zen andre bat, eta, hain zuzen, «prezio espekulatiboa» salatzeko hasi zuten okupazioa ELBk eta Lurzaindiak.
Uztailaren 15etik goiti, etxe nagusian sartzea deliberatu zuten, eta bertan segitu dute orain arte. Anartean, SAFER laborantza lurrak kudeatzen dituen egiturak lurrok erosteko lehentasunezko galdea egina zuen, 100.000 eurotan. Negoziazio luze baten ondotik, erantzuna jaso zuen, beraz, SAFER egiturak, jabeak irailaren 16a zuelarik erantzuteko azken epea. Abuztu bukaeran, gainera, BOST Berroetako Okupazioko Sostengu Taldea sortu zuen herritar talde batek okupazioa biziarazteko helburuarekin. Erantzuna ukan berritan, deliberatu dute aitzina segitzeko.
Arbonako laborariek lursailaren salmenta oztopatzea lortu dute
Jabeak ez du onartu lurrak SAFER egiturari saltzea, 80 eguneko okupazioaren ostean. Euskal Hirigune Elkargoa negoziaziora batu da
Iruzkinak
Ez dago iruzkinik
Ordenatu