Beste aurrerapauso bat

ASOk, Frantziako Tourra antolatzen duen enpresak, Fleche Wallonne klasiko ospetsuan parte hartzeko gonbita egin dio Euskadi-Muriasi
Murias taldeko txirrindulariak, Benidormen egindako egonaldian.
Murias taldeko txirrindulariak, Benidormen egindako egonaldian. LUIS ANGEL GOMEZ/ PHOTOGOMEZSPORT

Julen Etxeberria -

2019ko urtarrilak 23
Fleche Wallonne klasiko entzutetsua jokatuko dute heldu den apirilaren 24an. UCI World Tourreko proba izaki, talde onenak bertan arituko dira. Bada, horien artean izango da Euskadi-Murias taldea. ASOk, Frantziako Tourra antolatzen duen enpresak, gonbidapena egin dio Euskal Herriko taldeari Fleche Wallonnen lehiatzeko. Berri bikaina da Euskadi-Muriasentzat, eta beste aurrepauso bat onenen artean sendotzeko.

Pozarren hartu dute berria taldean. «Ametsa da. Aurten jaso ahal genuen berririk onenetako bat da. Munduko klasikorik ospetsuenetako bat da Fleche Wallone, eta han parte hartzea aurrerapauso oso garrantzitsua da ASO gure alde egiten ari den apustuan. Orain arte eginiko lanaren onarpena da. Gainera, horrek adierazten du non gauden gaur egun txirrindularitzan: mailarik gorenean, munduko probarik onenetan eta urrats pentsaezinak egiten», esan du Jon Odriozola Euskadi-Muriaseko kirol zuzendariak.

Behin tokia lortuta, protagonista izan nahi dute. «Saiatuko gara gure onena ematen, aukera aprobetxatzen eta protagonista izaten. Badakigu oso lasterketa zailak direla. Ez dugu esperientziarik halako probetan; gogoak, berriz, egundokoak izango dira, eta aurpegia ematen saiatuko gara», adierazi du Mikel Bizkarra Euskadi-Muriaseko txirrindulariak.

Euskadi-Murias World Tourreko bost probatan lehiatu zen iaz, Kontinental Profesional izan zen lehen urtean: Kataluniako Voltan, Euskal Herriko Itzulian, Donostiako Klasikoan, Espainiako Vueltan eta Turkiako Itzulian. Emaitza bikainak lortu zituen. Izan ere, Vueltan, Oscar Rodriguezek etapa bat irabazi zuen, eta, Turkiako Itzulian, Eduard Pradesek sailkapen nagusia eskuratu zuen. Denboraldi honetarako jada gonbidapena jaso du World Tourreko bi lasterketatan parte hartzeko, Voltarako eta Fleche Wallonerako, baita bigarren mailako Omango Itzulirako ere. Atzoko albistea oso presente izango da taldeak gaur Errenterian (Gipuzkoa) egingo duen aurkezpenean.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna

Izan zaitez BERRIAlaguna

Irakurtzen ari zaren edukia libre ematen jarraitu nahi dugu. Euskaraz informatzea da gure eginkizuna, zure eskubidea. Sareko irakurlea bazara, konprometitu zaitez irakurtzen ari zarenarekin. Geroa zugan.

Izan zaitez BERRIAlaguna