Albistea entzun

BAD, eszenako arteentzako aterpe bat

Bilboko Antzerki eta Dantza Garaikidearen jaialdiak sei estreinaldi eta hogei emanalditik gora eskainiko ditu, guztira, gaur hasi eta hilaren 23ra bitartean.
Sleepwalk Collectivek eta Christropher Brettek sortutako <em>Psychodrama</em> obra.
Sleepwalk Collectivek eta Christropher Brettek sortutako Psychodrama obra. LADALIANEGRA Tamaina handiagoan ikusi

Iñigo Astiz -

2022ko urriak 13 - Bilbo

Mende laurdenetik urrats bakar batera. Antzoki konbentzionaletako egitarauek kanpoan utzi ohi dituzten proposamen garaikideentzako aterpe moduko bat sortzeko jarri zuten abian BAD Bilboko Antzerki eta Dantza Garaikidearen Jaialdia Bilbon, justu duela 24 urte, eta helburu horrekin jarraitzen du orain ere. Guztira, hamasei konpainiaren hogei emanaldi baino gehiago eskainiko ditu bihar hasi eta urriaren 23ra arte. Gainera, erabateko estreinaldiak izango dira ikuskizun horietariko sei. Euskara hutsezko bi lan daude egitarauan —lau izan ziren 2019an, bi 2020an, eta hiru 2021ean—, eta euskara eta gaztelera uztartzen dituzten beste bi. Metrokoadroka konpainiaren Zeozertan dabil baina ez dakit zertan antzezlanaren aurrestreinaldia izango da euskara hutsezko lan horietako bat. Gaur izango dute saioa, Fundicion aretoan, eta harekin abiatuko da festibala.

Bilboko Udalak antolatzen du jaialdia. 150.000 euro inguruko aurrekontua izan du azken urteetan, eta beti jarri diote arreta berezia Euskal Herriko eszenari. Aurtengoan, esaterako, bederatzi izango dira jaialdian parte hartuko duten euskal konpainiak, eta estreinaldiak eskainiko dituzte haietako seik. Eszenako arteen adar guztiak hartzen ditu kontuan jaialdiak, bestalde, eta, beraz, dantza garaikidea, arte biziak, antzerkia, performancea eta dramaturgia berriak ikusteko aukera izango du ikusleak egunotan. Elkarrekin nahastuta ere bai, maiz, euskal konpainien estreinaldiek erakusten dutenez.

Diziplina artekotasuna

La fragilidad de mi pene (Nire zakilaren hauskortasuna) pieza estreinatuko du Mollis konpainiak, esaterako, bihar, Fundicion aretoan. Antzerki fisikoaren, dantzaren eta zirku pieza baten arteko hibridoa da lana. Platea izeneko proposamena aurkeztuko du Tripak kolektiboak. Harrobia aretoan izango da emanaldia, larunbatean, eta antzerkia eta performancea uztartuko ditu ikuskizunak.

Denis Martinez dantzari eta koreografoak 365 obra estreinatuko du urriaren 17an, Campos antzokian, eta Vulnera konpainiak Lo que no se ve (Ikusten ez dena) 18an, Harrobian. Indibidualismo espazialak gorputzak nola merkaturatzen, erabiltzen eta zanpatzen dituen erakusten duen antzerki pieza bat da azken hori, eta, konpainiak egindako sinopsiaren arabera, ondorengo galdera du ardatz: «Zeren alde ari gara erabiltzen forma artistikoa?».

Itziar Manero antzerkigileak bere amonaren memoria galera eta memoria historikoari buruzko hausnarketak uztartzen dituen Memoria eskainiko du 19an, eta Otempodiz izeneko ikuskizuna aurkeztuko du 21ean Ertza konpainiak, Mozambikeko Fenias Nhumaio eta Deissance Machava dantzariekin elkarlanean.

Horiez gainera, Sleepwalk Collective euskal konpainiak eta Christopher Brett idazle interprete eta musikari kanadarrak Psychodrama obra taularatuko dute 15ean, Fundicion aretoan. Itzuli konpainiak Oihana taularatuko du 16an. Bailar al sonido aurkeztuko du Sandra Gomez dantzariak (urriak 20). Societat Doctor Alonso konpainiak, Compañia Ensallek eta Aves migratorias de Madrid taldeak ere emanaldi bana aurkeztuko dute. Olga Cirqanalogique konpainiak LP Long play zirku eta musika ikuskizuna eskainiko du bihar, bestetik, eta Utopisistas taldeak I'll be back dantza ikuskizuna. Suitzako, Suediako, Italiako eta Euskal Herriko dantzari banarekin, kasu horretan.

Iraute hutsa, erronka

Izan ere, konpainien arteko hartu emanak sustatzeko helburua ere badu jaialdiak, antolatzaileek azaldu dutenez. «BADek sareak zaintzen ditu, eta zubiak eraikitzen ditu arteen eta elkarlanaren bidez, programazioa aberasteko eta publikoarekiko harreman zuzenaren alde egiten duten proposamenak eskaintzeko».

Iraute hutsa ere bada lorpena, edonola ere. Alicia Otxandategi BAD jaialdiko zuzendariak desagertze bidean deskribatu zizkion BADen moduko jaialdiak BERRIA-ri, 2019. urtean. Koronabirusaren krisia lehertu aurrean, alegia. «Erreferentziazko jaialdia da jadanik [BAD], bai nazio barruan, bai nazioartean. Jaialdi asko desagertu dira urteotan, eta arte eszeniko garaikideen jaialdi ospetsuenetako bat bihurtu gara: Temporada alta, TNT, BAD eta ez daude askoz gehiago». Eta, beraz, bi urteko osasun krisia gehitu behar zaio orain Otxandategik irudikatutako paisaiari.

Hainbat tailer eta profesionalentzako topaketa ere antolatu dituzte jaialdiak iraun bitartean, eta, bestetik, hiru saio ikusteko bonuak 20 euroan salduko dituzte eta bost saio ikustekoak 30 euroan.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

Zugaza, Herraez, Gonzalez, Zupiria eta Ormazabal, gaur, Gasteizen. ©IREKIA

Euskal artisten 26 artelan erosi dituzte museoek, Jaurlaritzak diruz lagunduta

Aitor Biain

Artium museoak, Biboko Arte Ederren Museoak eta Tabakalerak elkarrekin erosi dituzte 18 euskal artistaren obrak, 200.000 euroko ezohiko diru laguntza bati esker.

2023ko Bertsoaoa zikloko irudia, Leire Urbeltzek egina. ©Nafarroako Bertsozale Elkartea

Iruñeko Bertsoaroa otsailaren 9tik martxoaren 2ra eginen dute

Berria

Nafarroako Bertsozale Elkarteak eta Iruñeko Udalak antolaturik, sei emanaldirekin osatu dute zikloaren egitaraua. Lehenbiziko aldiz, bertso afari bat ere izanen da.

Gorka Moreno, Amaia Ozerin eta Patxo Telleria, gaur goizean, 'Sormen Ola' proiektuaren aurkezpenean. ©OSKAR MATXIN EDESA / FOKU

Gazteentzako tailer sorta bat antolatu dute Loraldiak eta EHUk

Olatz Enzunza Mallona

Gazteen artean euskal kulturaren transmisioa sustatzeko asmoz, Sormen Ola programa abiatu dute Loraldiak eta EHUk. Parte hartzaileek formakuntza tailerrak jasoko dituzte hilean behin, sortzaile profesionalek gidatuta. Larunbatean egingo dute lehenengo saioa.

Slawka Grabowska eta Amaia Garcia antolatzaileak, Mari Jose Telleria Gipuzkoako Kultura diputatua eta Olatz Osa Elkar argitaletxeko zuzendaria, gaur goizean, jaialdiaren aurkezpenean. ©Jon Urbe / Foku

Otsailean egingo dute Lumafest jaialdia Donostian, bigarrenez

Naroa Torralba Rodriguez

Zabalik dago mikrokontakizunak bidaltzeko epea. Otsailaren 9tik 11ra tailerrak eta hitzaldiak izango dira Koldo Mitxelena kulturunean.

Kinka buletina

Klima larrialdiari eta ingurumenari buruzko azken berriak zabaltzen dituen buletina.

Iruzkinak kargatzen...

Izan BERRIAlaguna

Zure babes ekonomikoa ezinbestekoa zaigu euskarazko kazetaritza independente eta kalitatezkoa egiten segitzeko.