Bost egongo dira adi-adi gaur

Gaur 12:00etan zozkatuko dute Espainiako Kopako bigarren kanporaketa, eta Euskal Herriko bost talde egongo dira adi-adi. Lehen kanporaketa gainditu duten bost euskal taldeak dira: Alaves, Amorebieta, Reala, Eibar eta Osasuna. Mailarik gorenetan ari direnak dira ere bai. Ez dute izan zoritxarreko ezusterik.

Alaves, Amorebieta eta Reala herenegun sailkatu ziren, hurrenez hurren, Unami, Europa eta Panaderia Pulido kanporatuta. Eibarrek eta Osasunak, berriz, atzo egin zuten lehen urratsa. Gipuzkoarrek Gernika utzi zuten bidean, Urbietan 1-2 irabazita. Quiquek eta Blanco Leschukek sartu zituzten bisitarien golak, 36. eta 62. minutuetan, eta Aranak etxekoena, 71.ean. Nafarrek, ordea, estutasun gutxiago izan zituzten: 0-4 nagusitu ziren San Agustin del Guadalixen zelaian. Barberok, Torresek, Ontiverosek eta Chimy Avilak sartu zituzten golak, guztiak bigarren zatian.

Peña Sport, Real Union eta Leioa, ordea, Kopatik kanpo geratu ziren. Bizkaitarrek eta nafarrek aurkari indartsuak zituzten: Elx Lehen Mailakoa eta Malaga Bigarren Mailakoa, hurrenez hurren. Etxean jokatu zuten bi euskal taldeek, baina ezin izan zuten ezustekoa eman, eta galdu egin zuten: Leioak 0-2, eta Peña Sportek, 0-3. Real Unionek, berriz, koska bat beherago dagoen aurkaria zuen: Cristo Atletico. Baina Palentziako (Espainia) taldeak 2-0 hartu zuen mendean Irungoa (Gipuzkoa).

Lehen Mailako taldeak izanik, Alavesek, Realak eta Osasunak haiek baino koska batzuk beherago dauden taldeen aurka jokatuko dute bigarren kanporaketa. Amorebietari eta Eibarri, ordea, maila berean edo koska bat beherago dagoen kontrarioren bat egokitu dakieke. Athleticek, berriz, jokatu gabe segituko du. Hurrengo kanporaketan ekingo dio Kopari, final-hamaseirenetan.