Bozkatu dute kultur politikaren koadroa

Euskal Elkargoak bere urteko azken Kontseilu Elkargoa izan du. Azken hautuzko eta baitezpadako eskumenak finkatu ditu
Euskal Elkargoaren kontseilua atzo, 233 hautetsietatik 210 hurbildu ziren; eskumen andana bozkatu zituzten.
Euskal Elkargoaren kontseilua atzo, 233 hautetsietatik 210 hurbildu ziren; eskumen andana bozkatu zituzten. BOB EDME

Nora Arbelbide Lete -

2018ko abenduak 16
Proiektu politiko osoa otsailean du aurkeztekoa Euskal Elkargoak. Baina urtea bukatu baino lehen, ezinbestekoa zitzaion bere gain hartu beharreko azken eskumenak bozkatzea, legeak hori baitio, gero berantegi baitzitekeen. Hogei bat erabaki bozkatu zituen atzo, eta horien artean, kultur politika baterako koadroari lotua azkena.

Elkargo mailako interesa duten azpiegitura kulturalen eraikuntzaren, antolaketaren, mantentzearen eta kudeaketaren eskumena bereganatu zuen atzo. Eta horrekin, azken finean, behin betiko borobildu zuen azaroaren 3ko kontseiluaren bozkatu koadro nagusia.

Arte ederren eskola, musika, dantza eta antzerki kontserbatorioa, Miarritzeko Atabal, Baxenabarreko mediatekak, Gixune eta Bidaxuneko gazteluak eta beste, horiek dira atzo Elkargoan sartu azpiegiturak. Afera da kontserbatorioa kasik gelditu zela elkargotik kanpo. Azaroaren 3ko bozketan kontserbatorioa elkargo mailakoa zela zioen erabakiaren aldeko bozak ez zuen aitzinera egin ahal izan. Finantzaketa kontuak izan ziren hor eztabaidan, herri batzuek beren sakelatik gehiegi ordaintzea gaitzetsi baitzuten. Atzokoan, berriz, finantzaketa mota berri bat aurkeztu zuten, eta horri esker zen onartu kontserbatorioaren elkargo mailako interesa. Zuzenki kolektibitateak kudeatuko du kontserbatorioa, finantzabide propioa izanen duen konpainia publiko batekin.

Horiek horrela, lehen aldiz, Hendaiatik Santa Grazira euskal kultura sustatzeko politika publiko bat plantan jartzen ahal du egitura publiko batek. Halere, hautetsiek bozkatu erabakiak ikusiz, eta hautetsiekin oraindik kontrastatzeko aukerarik izan gabe ere, ez dirudi gauza handirik aldatuko denik. Ikusi behar da zein aurrekontu izanen den, baina halako jarraipen bat hauteman daiteke, erabakietan tokiko politiken «trebetasuna» goraipatzen dutela. Irakaskuntza artistikoa, sorkuntzaren aldeko laguntza, hezkuntza artistiko eta kulturala, kultur ondare immateriala, sektore kulturala laguntzea tresna eta partaide berriak garatuz, horra bere oinarriak. Adibide bat emateko, sorkuntzari dagokionez, sortzaile gazteak laguntzea du xede, «profesionalizazioaren bidean». Eta «industria sortzaileen garapena» sostengatu nahi du.

Irakurketa publikoa ere bere gain hartu du elkargoak. Baita mediatekak sare berean jartzea. Mugaz gaindiko eta nazioarteko elkarlanak ere agertzen dira. Proiektuaren perspektiba «dinamikoa» izanen dela segurtatzen dute testuan. Egokitzen ahalko dena, abisatzen du testuak. Norabide berriak segitzen ahalko dituela. Mementoko, bost helburu nagusi finkatu ditu.

Zeharkakoa

Helburu bat euskal kulturari zuzendua da. Hobeki errateko, euskal kultura eta Gaskoiniako kulturari. Lerro bakarrean, biak maila berean emanak dira. Hortaz, euskal kulturari eta Gaskoiniakoari lotu «ekintza bereziak transbertsaltasunean kontuan hartzea» du helburuetako bat.

«Eremu artistiko eta kultural guztietan eragin» nahia ere aipatu du. Baita publiko «gazteari, kultura eskuragaitza dutenei eta urrunduei» lehentasuna ematea ere. Herrien arteko proiektuen «logika» batek bultzatu politika garatzea, eta herri, hiri eta beste partaide instituzionalekin «osagarritasuna» bilatzea, horra beste helburu bat.

Kontua da, Frantziako Estatutik hiri eta herrietara, kultur eskumena eskumen partekatua dela. Departamenduak eta eskualdeak ere badute eta Euskal Kultur Erakundeak ere (EKE), non entitate horiek ere barne diren.

Interesgarria da ere ikustea eremu artistikoak aipatzean Frantziako Kultura Ministerioak «definitzen eta ezagutzen» dituenak direla zehaztea. Arte bisuala, lengoaiaren artea, espazioaren artea, soinuaren artea, ikuskizun bizidunaren artea eta egunerokoaren artea ditu bereizten. Eguneroko artean, adibide bat ematearren, parentesien artean arte herrikoia sartua dute.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna

Izan zaitez BERRIAlaguna

Irakurtzen ari zaren edukia libre ematen jarraitu nahi dugu. Euskaraz informatzea da gure eginkizuna, zure eskubidea. Sareko irakurlea bazara, konprometitu zaitez irakurtzen ari zarenarekin. Geroa zugan.

Izan zaitez BERRIAlaguna