Umorea izango da inaugurazio galaren ardatzetako bat

Donostiako 66. Zinemaldiaren inaugurazio galak (Kursaaleko auditoriuma, 21:00) umorea izango du ezaugarrietako bat. Borja Kobeagak, Diego San Josek eta Borja Etxebarriak idatzi eta zuzenduko dute, eta, atzo adierazi zutenez, umorez jorratuko dituzte zinemaldien berezitasunak, batik bat Donostiako Zinemaldiarenak, bai eta hiriaren «toki paregabearen izaera» ere. Nagore Aranburu eta Belen Cuesta aktoreek aurkeztuko dute gala.

«Garai txarrak bizi ditu umoreak. Ematen du erasota sentitzen garela norbaitek gure usteei buruz ironiaz edo barrez hitz egiten duenean. Umorea funtsezkoa izan da beti adierazpen artistikoan, eta, bultzagarri izatez gain, norbera eta behin eta berriro errepikatzen diren topikoak zalantzan jartzeko balio du. Kasu honetan, irri egin nahi diegu gure hiriaren eta jaialdiaren harira aipatu ohi diren toki guztiei», esan zuen, bestalde, Jose Luis Rebordinos zinemaldiko zuzendariak.

Gala umorezko bakarrizketa batekin hasiko da, eta bideo komikoak tartekatuko dituzte. Horrez gain, oholtzara igoko diren gonbidatuek zinemaldiko sailak aurkeztuko dituzte.