HITZ ETZANAK

Izena

Andoni Egaña -

2018ko uztailak 10
Propio galdezka ibili naiz inguruan. «Zer izen zuen?». Gehienek onartu didate, mihiaren puntaraino ekarri arren, ez direla gauza gogoratzeko. Eta ez dira hiru urte ere —irailaren 2an etorriko dira— Turkiako hondartza batean ahuspez etzanda ikusi genuela. Gure umeak bezalatsu jantzia zegoen: kirol oinetakoak, praka bakeroak eta nikia. Gure umeek siesta egiten duten jarrera berdintsuan zetzan, baina hilda. Haur siriar haren irudiak eragin egin zigun. Hedabideetan behin eta berriz azaldu zen eta guztiok ikasi genuen bere izena. Mila eta bat gau aski izan dira, ordea, ahanzteko.

Hedabideetan behin eta berriz azaltzen denak nekez utziko gaitu ez zerurako eta ez lurrerako. Garai batean Txileko meatzarien erreskatea izan zen ikusgai. Joan den bi asteotan leize zulo batean harrapatuak geratu diren Thailandiako gaztetxoena izan da. Etxekotu egiten dizkigute hedabideek, eta emozioz eta borondate onez segitzen ditugu eguneroko gorabeherak. Gero, segituan ahaztuko zaizkigu...

«Elian» erantzun dit batek. Hurbil baina oker. Elian «ume baltsero» kubatarra zen, eta joan dira ia hogei urte ordukotik. Aylan zen hondartzan zetzan haur siriarraren izena. Haren izena ahaztu dugu. Izenik ere gabe hondoratu diren milaka haurren izana ere bai segur aski.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna

Izan zaitez BERRIAlaguna

Irakurtzen ari zaren edukia libre ematen jarraitu nahi dugu. Euskaraz informatzea da gure eginkizuna, zure eskubidea. Sareko irakurlea bazara, konprometitu zaitez irakurtzen ari zarenarekin. Geroa zugan.

Izan zaitez BERRIAlaguna