HITZ ETZANAK

Fidakaitz

Andoni Egaña -

2018ko uztailak 17
Badut adiskide bat fidakaitz eta ezkor agertu ohi dena politika kontu larriak aipatzen direnero. Dela Kataluniari buruzko irtenbidea, dela Euskal Herriaren estatus berriaren inguruko zerbait, gaia edozein dela ere, sudurra muzintzen du, eta, beti, adibide bera jartzen du bere fidakaiztasunaren euskarri: «Ez diat etxeperik ezagutzen igogailua jarri behar eta xextrarik gabe konpontzen asmatu duenik. Halakoak gaituk. Hik uste duk txikikeriatan konpondu ez eta kontu potoloagoetan konpontzen asmatuko dugula?».

Beste lagun batek ekologia aipatzen denean azaltzen du bere ezkortasuna. Geure zilborrera begira bizi garela hasten da erretolikan; egunkariak beteak daudela aurpegi azalerako urre eta hialuroniko azidoz emandako tratamendu eskaintzaz; bakoitza berera doala... «Hik uste duk hurkoari agurrik ere egiten ez diona benetan dagoela kezkatua munduak hemendik hiru-lau belaunalditara izango duen itxurarekin? Plastikoz betetako itsasoa ikusten duenean espantuka hasiko duk, baina segituan ahaztuko zaiok, eta jarriko duk berriz ere ispiluari begira».

Bukatu berri den Munduko Futbol Kopan, japoniar zaleek inork agindu gabe eta euren artean ados jarrita harmailak garbitu dituzte partidak amaitu orduko. Ez naiz ni hain ezkorra...

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna