BIRA

Jolas bat

Miren Amuriza -

2018ko ekainak 30
Jolastuko gara lagunak izaten? Zelan jolasten da, ba? Hara: zerbait hartzeko gera gaitezke, gaurko moduan; nik nire berri emango dizut eta zuk hizketan diharduzun bitartean entzuten ari naizelako plantak egingo ditut eta alderantziz, ulertzen? Bai... Alegia, ezin diogula elkarri moztu baina ez daukagula, adibidez, galderarik-eta egin beharrik. Ados, baina nik geratzeko zail edukiko dut, e? Lasai, ez daukagu aurrez aurre egon beharrik ere; telefonoz egin genezake berba edo, are, WhatsAppetik lantzean audio bat trukatu. Edozein audiok balio du? Bai, mezuaren amaieran laster elkartzeko promesa eginez gero, bai: minutu batera artekoek puntu bat balio dute, hirutik bostera bitartekoek bi eta bostetik gorakoek lau puntu. Eta ez bidaltzeagatik puntuak galtzen dira? Zelan puntuak galdu? Adibidez, zure urtebetetzean zoriontzen ez bazaitut-edo... Modu pribatuan zoriondu ez arren, sare sozialetatik zoriontzen banauzu ez. Ados. Halere, hau ez da galdu-irabaziko jolasa e? Galdu-irabazikoa? Esan gura dut, zenbat eta jende gehiagok eduki gure hartu-emanaren berri, biok irteten garela irabazten! Ados, ados. Ea, atera dezagun selfie bat perfilean ipintzeko! Aizu, argazkia ateratakoan, zera, mesedetxo bat eskatu gura nizuke... Barkatu baina ez nago mesedeetarako. Baina ez al duzu esan lagunak garela? Ez, lagunak izaten jolastuko garela esan dut.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna