Honako edo halako erakundek ikasturte politikoa amaitutzat jo duela jakin ahal izango dugu egunotan. Beste zenbaiten ikasturte politikoa hamabost egun edo hilabete barru bukatuko da. Eta niri belarrian sekulako krakatekoa eragiten dit ikasturte-politiko-amaiera uztartze horrek. Ez dut esan nahi politikariek oporraldirik merezi ez dutenik. Sakonagokoa da kontua.
Ikasturtez ikasturte hartze hutsak bistarazten du politikaren ikuspegi jakin bat. Politika da bozketa bidez horretarakoxe aukeratu ditugun pertsonek lurralde jakin bateko baliabideen inguruan burutzen duten kudeaketa lan soila. Politika hori balitz, edo hori soilik, ulertuko nuke ikasturte bat hasi eta bukatzea eta irailean berriz ekitea... Politikariak eurak dira, ordea, hitz larriak erabiltzen dituztenak: elkarbizitza, burujabetza, gizarte eraikuntza, iraultza, berrindartze etikoa... Eta nekez sartzen zait buruan horiek ikasturtearekin eta hasiera-amaierekin zerikusirik nola izan dezaketen. Gila irudikatzen dut telefonoaren alde batera: «Kaixo, zer zara, arerioa? Ba, begira, deitzen dizut ikasturte politikoa amaitu dugula abisatzeko eta irailean ekingo diogula berriz bizikidetza planari».
Noiztik du udak dena izozteko ahalmen hori?
HITZ ETZANAK
Ikasturtea
Iruzkinak
Ez dago iruzkinik
Ordenatu
