Nor

Han ez da demokraziarik. Baina hemen hainbat hauteskunde deialdi izan dituzte. Azken hogei urtean hogeita hiru aldiz jo ahal izan dute hautetsontzietara. Hango presidentea ez da herriak aukeratua. Hemengoa bai ez dugula herritarrok zuzenean aukeratzen! Han egoera negargarria da, ez baitute elikagai eta sendagai aski. Hemen ez da askoz hobea. Blokeoa, gainera, batzuek besteei egiten diegu hemen, eta aski elikagai izango ez duen beldurrak jotako asko dago loa bilduko badu pilulak hartu behar dituena. Oposizioa egiteagatik politikariak preso sartzen dituzte han. Hemen ere bai. Eta, gainera, barregura sortzen die poliziei, kataluniar presoen trasladoan hauei babesa ematera azaldutako herritar jendeak.

Hemendik hangoa konpontzea errazagoa da hemendik hemengoa konpontzea baino nonbait. Ez dakit europar agintariak mezatara askotan edo gutxitan joandakoak diren. Baina bazen esaldi bat aintzat hartzekoa: «Ni ez naiz nor zure etxean sartzeko...». Maduro presidenteari egurra ematen ari direnek jakin behar lukete hori.

Zorionez, mundua ez da Europa eta Amerikako Estatu Batuak bakarrik. Txinak, Errusiak, Vatikanoak berak akaso... ez diote men egin chavismoaren aurka harrotu den aitzakia parrastadari. Hala hobe. Ikuspuntu bakarra beti da murritza...