Bila

Pablo Picassok bota zuen: «Ni ez naiz bila ibiltzen; nik, aurkitu egiten dut». Harroxko esana dirudi. Ahoberokeria. Eta zinez esan zuen ere zalantzan jarriko nuke; artista handia zen, baina. Sinesgarriagoa egiten zait «artelan orok etorritik hamarren bat du eta ekarritik hamarretik bederatzi» zioen esaldi hura. Edo «inspirazioak lanean harrapa zaitzala» zioena. Horiek ere berak esan omen zituen...

Bila ibili gabe aurkitze hori oraintxe bihurtu zaigu inoizko zailen. Bila ibilita ere badugu nahikoa lan ezer aurkitzen. Zientzialariak, txertoaren bila; aztarnariak, harremanen xerka; politikariak, hitzak galbahean nola iragaziko. Eta, halere, urtebeteren buruan, gutxi dakigula esango nuke. Gutxien dakigunon eta gehien dakitenen arteko aldea ez dela behar hainbestekoa, duela urtebete baino handiagoa izango da, baina. Gutxi batzuk salbu —zientzialariak— ez geunden zetorrenerako prestaturik. Gure heziketa dela eta, fedeak mendiak mugi zitzakeela sinistuta geunden. Berandu jabetu ginen —Zaldibarkoarekin— mendiak ere diruak mugitzen dituela.

Egun, «ni ez naiz bila ibiltzen; nik aurkitu egiten dut» esaldia ez dezake birusak baino bota. Umiltasun ikasgai handia pertsonontzat. Baina erne! Hain gara txoroak! Gu gai gara gure umiltasunaz harro azaltzeko ere.