Albistea entzun

HITZ ETZANAK

Hamalau

Andoni Egaña -

2021eko ekainak 2

Banuen zerbaiten susmoa, eta begira ibili naiz. Quarterly Journal of Experimental Psychology aldizkaritik atera dut datua. Egunean hamalau orduz aritzen gara pertsonak hizketan. Izugarri dirudi.

Ez du zehazten, ordea, hamalau ordu horietatik zenbatetan aritzen garen kanporako berbetan eta zenbatetan barne-hizketan. Horixe litzateke interesgarri eta neurgaitzen. Ahots-harien osasunarengatik bada ere, pentsa dezagun hamalau ordu horietatik gehien-gehienak barne-hizketan ematen ditugula. Horrela ulertuko litzateke kanporantz beste hizkuntzetan aritu arren, norberea ez kamustea. Geure baitarako asko jardutearen abantaila...

Bestelako ariketa bat burutuko dute bihar Bilboko Arriaga antzokian. Erabat kanporanzkoa. Bernart Etxepareren Linguae vasconum primitiae irakurriko dute ahots gora, txandan-txandan, 200 irakurlek. Bilbo Zaharra euskaltegikoek hamalaugarrenez antolatu duten Klasikoen irakurraldirako Xabier Amurizak egin du ahapaldiak hautatu eta euskara batura ekartzearen lana. Zati batzuk deklamatu egingo dituzte; kantatu beste batzuk. Ederra izango da. Nik, kalkuluak egitera jo dut ia nahi gabe. Zenbat euskaldunek zenbat barne-hizketa ordu eman beharko dituzten, bost mende barru antzeko zerbait gerta dadin. Puf! Milioika...

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.