Kezkak

Pasatu da. Urriko Azken Astelehena joan zen: gaur urriko azken asteartea da. Alde batetik, bakea izango dugu: Gernikan aparkatzea ezinezko misioa izan da azken egunetan. Beste alde batetik, kezka gelditzen da urteroko azoka erraldoia joan eta gero. Kezka, urte guztian inbisibilizatuta daudelako baserritarrak. Kezka, asteleheneroko azokan gero eta jende zaharragoa dabilelako salerosketan. Kezka, folklorea apaintzeko erabiltzen ez bada, lehen sektoreak ez daukalako inolako interesik administrazioarentzat. Kezka, lanerako lurrik onenak porlanez betetzen ari direlako hemen eta han. Kezka, baserritarrak izan nahi duten gazteentzat laguntzarik ez dagoelako. Kezka, administrazioaren baimenez irekitzen dituzten supermerkatu handiek presioa egiten dietelako bertako ekoizleei. Kezka, baserriak erortzen ari direlako. Kezka, gazte askok bizimodua ateratzeko moduko lurrak daudelako sasiak eta espezie inbaditzaileek janda. Kezka, mermelada bat egin eta saltzea konplikatuagoa delako hemendik hamar itsasotara ereindako soja eskuratzea baino. Kezka, udan beroa eta neguan hotza pasatzeko diseinatu zuten eraikin batean irauten duelako urte guztian azokak. Kezka, eusko labelarekin saltzen dituzten produktuen kalitatea zalantzazkoa delako.

Eta atzoko parafernaliak ere ez ditu kezkok uxatzen.