Umetako testuliburuetan TALGOrekin ikasi genuen akronimoa zer zen. Tren Articulado Ligero Goikoetxea Oriol. Ikasgaiaren hautuak zerikusirik izango zuen zelako Goikoetxea hark gerra zibil garaian egindako traizioarekin. Baina umeari grazia egiten dio jolas literario ñimiño hori ulertzen duela sentitzeak...
Badira akronimo pisu handikoak, izendatu hutsez guztiok ulertzen ditugunak: OTAN edo NATO, ELA-STV, ETB, HiES... Badira beste akronimo batzuk, hitz arrunt gisara fosildu eta akronimotzat jotzen ez ditugunak: radarra Radio Detection And Ranging zen; laserra, Light Amplification...
Azken hilabeteotan EAEko herritarrok mihian gehien erabili ditugun hitzetako bat izango da. Tabernariak bera aipatzen zuen, oraintxe beldurrez oraintxe itxaropenez; maitea urrun samar zuen maiteminduak bera zuen ahotan hamabostean behin; kirol jakin batzuk egin nahi zituena bere erabakiaren zain egoten zen, adi-adi. Nork osatzen zuten jakin nahian asko ibiliko zen. LABI. Ditxosozko LABI! Antzematen zitzaion akronimoa behar zuela. Sumatzen zen —tarteko B horrengatik— euskaraz zela. Bila ibili behar izan dut zer esan nahi duen jakiteko. Larrialdiei Aurregiteko Bidea. Ez dago gaizki. Baina Tartasen Ontsa hiltzeko bidea dakar gogora. Horixe txarra...
HITZ ETZANAK
Akronimo
Iruzkinak
Ez dago iruzkinik
Ordenatu