Albistea entzun

HITZ ETZANAK

Balekite

Andoni Egaña -

2021eko ekainak 23

Zeharka egin zuen topo estreinakoz Francorekin. Afrikako gerran. Baina bata derrigorturik joan zen soldadu, eta tifus-sukarrek jota hil ote zen ere zabaldu zen. Bestea, bere militar-karrera hauspotzen ari zen, mairuak hil eta hil, sarraskia hemen eta sarraskia han.

Harreman estuagoa izan zuten gerora. Batak gerra piztu zuenean hasi zen ihesean bestea. Laredon lehenik, Larrinagako espetxe zaharrean gero, Donostian... preso egon zen gerra zibilak iraun zuen bitartean. Gerra amaitu, eta Gasteizen bizitzen jarri zelarik, berriz atxilotu zuten eta Bakea kaleko espetxean sartu. Huescan eduki zuten gero bahiturik eta Iruñera ere jo behar izan zuen, bizilekutik gutxienez 100 kilometrora aldendu zuten bolada batez. Frantziara jo zuen ihesean azkenik, Parisera. Baionara hurbildu zen urte mordo baten buruan...

Gasteizko Umandi ikastolako horman Esto con Franco no pasaba, Transformers no eta Marikas idatzi duten homofobo-transfoboek, ez dakite deus Andoni Urrestarazu Umandi-ri buruz; ez dakite ezer Francoren gainean; ez dakite zer den bizitza erdia baino gehiago ihesean ematea; ez dakite. Eta harro daude ezjakintasunaz. Millán Astrayren «Behera adimena!» idaztea baino ez zitzaien falta izan. Idatziko zuketen... balekite.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.