Nori zer?

Kontu serioa da baina txantxetarako ere eman dezake. Ingurugiroaren aldeko aktibista talde batek Vincent van Goghen artelan bati tomate zopa jaurti zion duela pare bat aste Londresko National Galleryn. Joan zen igandean beste talde batek Postdameko Barberini museoan, Claude Moneten Les meules artelana narrastu zuen, patata purea jaurtiz.

Ondasunak neurriz gain xahutzen ari garen garaiotan, ondarea baliatu dute arreta erakartzeko. Ez dago gaizki pentsatua. Ez dakit zenbateraino nagoen ekintza horien alde eta zenbateraino ikusten dizkiedan alderdi ilunak. Hori da gutxienekoa.

Ekintza horietatik abiatuta, otu zait Batxilergoko eskola batzuk emateko modu erakargarri bat. Zer jaurtiko genioke halakoren halako artelani? Zer legokieke? Esate baterako, zer botako genioke Arrueren artelan klasiko bati? Akaso intxaur-saltsa, aspaldikoa da hori ere eta. Ibarrola bati zer eta zergatik? Burgostik Bizkaiko ezkerraldera lanera trenean zetozen langileek putxera-tan prestatzen zituzten indaben saltsa lodi-lodia. Eta Zumeta bati? Usurbilgo sagarrondoetatik bildutako sagarrekin egindako konpota saltsa legokioke. Eta azalpen hutsa ez bazaie aski kitzikagarri, beti eraman daitezke ikasgelara artelanaren kopia bat eta tuperretan saltsaren batzuk...