HITZ ETZANAK

Galtzerdiak

Andoni Egaña -

2018ko uztailak 5
Pasadizoa lehendik zen ezaguna. Eric Olhatsek Realarentzat egiten zuen lan, iparraldean eta Frantzian talentu gazte bila. Duela dozena bat urte Parisen lehiaketa bati begira zegoela, mutil txiki ezker batek eman zion atentzioa. Montpellierrekin jokatzen zuen. Detaile ñimiño batek sortu zion esperantza. Mutiko hark ez zeramatzan taldekideen galtzerdi berdinak. Desberdinekin ari zen. Pentsatu zuen Montpellier taldeak fitxatu gabe zeukala artean, proban zeukatela. Jakin ahal izan zuen mutikoaren izena, baina ez helbide eta gainerakorik. Zubietara etortzera gonbidatu nahi zuen eta ezin zuen aukerarik galdu. Lehiaketa amaitu eta sari-emate unea baliatuz hurbildu zen mutikoarengana, eta hitz batzuk luzatu ondoren, txarteltxo bat sartu zion sakelan. Honela zioen: «Etxera iristean irakurri eta hitz egin zure aitarekin».

Nik ezagutu dudan arte, haurrak artean izar ez diren adin tarte horretan, futbolera bezala, piano eskolara, hara eta hona autoz ibiltzen dituztenak amak gehiago izaten dira aitak baino. Edo paretsu gutxienez. Baina aitarekin hitz egiteko eskatu zion, ez gurasoekin edo amarekin.

Antoine Griezmann da mutiko hura. Urtean milioiak irabazten ditu. Eta bere fitxaketak eta diru-sarrerak negoziatzen dituena... bere arreba da.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna