HITZ ETZANAK

Bero

Andoni Egaña -

2019ko ekainak 28
Asebeterik iritsi zen etxera atzo. Garagardo lata bat ireki zuen, gutxitan bezala. Eta beste bat gero; bero zegoen, eta, gainera, bazuen zer ospaturik. Ideiak parrastadan etorri zitzaizkion hirugarren garagardoarekin. Azken bederatzi hilabetean ezin izan zuen burutik uxatu eskolan nota onak ateratzen ez zituenean gurasoek egiten zioten mehatxua: «Espabila zaitez, bestela kale garbitzaile bukatuko duzu eta!».

Laburbiderik gabeko bizitza ibilbidea tokatu zitzaion gerora. Malkartsua oso. Kale garbitzaileen lan baldintzak desiragarri izan zitezen bezain pikoa askotan. Umetan mehatxu marrazten ziotena helburu izan zuen azken bederatzi hilabetean. Borroka latz egin ondoren lortu zuten urrats bat aurrera egitea…

Bederatzi hilabete. Haurdunaldi bat. Epaitegi eta polizia etxeak garbitzen zituztenen artean, bera zen gizonezko bakarretakoa. Zortea izan zuen bederatzi hilabetez altzo izaten ohitutako askorekin batera altzatzekoa. Laugarren garagardoarekin, pozaren berotan, berogailua etorri zitzaion gogora gero. Kalkuluak egiten hasi zen soldata igoerarekin datorren neguan, lehen aldiz, behar bezalako berogailu sistema jarri ahal izango zuen etxean... Segur aski ez. Pobrearen pozari beroarena kendu behar zaiola aspaldi ikasi zuen.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna