HITZ ETZANAK

Lege

Andoni Egaña -

2019ko irailak 27
Lanean aritu arren pobre izan zintezkeela erakutsi zigun orain dozena bat urte hasi zen krisialdiak. Bageneramatzan hamarraldi batzuk lanik gabe zegoena baino ez zena pobre. Memoriak oinak motzak ditu eta lagundu egin behar izaten zaio mugi dadin. Bartzelonan bizi zen neska gazte batek —Carolina Alguacilek— asmatu zuen mendearen lau-bosgarren urtean mileurista esamoldea. Errealitate garratz bati izena jarri zion. Egun, mendea adin nagusitasunera heldua, mila euroren muga hura askorentzat desira ere bihurtu da.

Gipuzkoako Foru Aldundiaren ikerketa lan baten ondorioa argia da: azken sei urtean pobrezia larria jasaten dutenen kopurua ez da urritu. Kronifikatu egin da gaitza. Lanik eza; lanean ari direnen prekarietatea; soldata negargarriak; alokairuen prezioa... Etorkizun ederra!

Agintariei ahoa bete-bete egiten zaie «berdintasuna», «justizia», «etorkizuna»... eta gisako hitz anpulosoekin. Zinemaldian herenegun ikusi genuen zein den irtenbidea. Zapi berdeetan idatzirik azaldu zuten Argentinan abortua legezkoa, segurua eta doakoa izan dadin aldarria. «¡Que sea ley!». Hitzik larrienek eta asmorik onberenek baino eragin handiagoa luke gizartean sortzen diren arrakalak berdintzeko orduan ere joera horrek. «Izan dadila lege!».

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna