Albistea entzun

HITZ ETZANAK

Jaietarako

Andoni Egaña -

2022ko maiatzak 21

Behin urte sasoi hau heltzean hasten dira ugaritzen. Beroarekin gehienetan. Bazoaz kalean, eta hurbildu egingo zaizkizu lehenik. Gainean ipiniko gero. Ez duzu erasotzat hartuko —gehitxo litzateke hori— baina azkenerako molestatu egingo zaituzte. Pelma jartzen dira. Sartuko zara tabernara, eta han ere uste ez duzun unean jiran sentituko dituzu. Irten atarira, eta han ibiliko dira zizti bati, zazta besteari. Mahaian bazaude zer esanik ez. Badakite handik ihesbide zaila daukazula...

Ez naiz euli eta mandeuliez ari; eltxo eta erleez ere ez. Zozketa-boletoez ari naiz. Kultur eta kirol ekimen askoren ezinbesteko sostengu izaten da zozketa-boletoetatik lortutako dirua. Bizimodua festaz festa ateratzen dugunok mordoa pilatzen dugu. Ez duzu beti ezetzik esango. Ez duzu beti diru xehearen faltaren aitzakia jarriko. Badakizu ordaindu behar dizutena non edo nondik atera beharko dutela... Zenbat balizko gau landetxe batean! Zenbat balizko txirrinda! Zenbat balizko afari jatetxe entzutetsuetan! Udaberrian sakelan balizko arkume sartzen duzuna, udan patrikan ibili ahaztuta, eta balizko ardi irteten da udazkenean.

Orain, ordea, pelmatxoak ere poz ematen du. Boleto-herri bat garen bitartean ez goaz hain gaizki. Jendea lanerako dagoela adierazten du horrek. Hori da saria.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Iruzkinak kargatzen...