Asko dakitenak ere ez datoz bat. Nondik dator barraka hitza? Batzuek arabieran kokatzen dituzte hitzaren erroak; italieran besteek; hitza katalanetik datorrela dioenik ere bada. Arrantzaleek edo nekazariek aldi baterako eta era oso xumean jasotzen zituzten eraikinak ziren garai batean barrakak. Buztinez eta kanaberaz egiten omen zituzten. Guk, lanerako ez, baina festetan ezagutu izan ditugu. Eta hauxe da urte sasoia herrietako plazak barrakaz betetzen direna.
Nerabezaroan, gaztelerazko kantuak ikasten genituen lekua ziren barrakak. Ez genuen inguruan toki erdaldunagorik. Han itsasten zitzaizkigun «la felicidad, ¡ja, ja, ja, ja!... de sentir amo-o-o-o-or» eta horrelako kantuak. Orain, adi egoten naiz barrakak sumatzean ze musika klase jartzen duten. Eta poztekoa da. Euskal abesti mordoa entzun daiteke herri batzuetako barraketan. Sumatzen dut udalen batzuk baldintzak jarriko dizkietela barrakazaleei...
Halere, zenbait kontuk krakatekoa eragiten dit barraketan. Bide-heziketari gero eta garrantzi handiagoa ematen zaio ikastetxeetan, eta auto-txokeak ditugu jolas. Bizikidetza lantzen dugu, eta tiro-pitxoneko eskopetak dauzkagu eskueran. Ez dakit. Akaso, gure heziketa asmo onenek ere buztinezkoak dituzte zutabeak.
HITZ ETZANAK
Barrakak
Iruzkinak
Ez dago iruzkinik
Ordenatu