BIRA

Ez

Onintza Enbeita -

2018ko azaroak 16
Ez beti da ezetz. Ezetz esaten ez dakigulako esaten dugu bai. Ezetz esatearren umeak ez zaitu gutxiago maiteko. Gaur ez baduzu nahi ere, bihar nahi baduzu, posible izan daiteke. Ez daukat gogorik. Hau ez da momentua. Ni ez nago prest. Ez dut halakorik erabaki. Ez nago ziur. Ez, horrela ez. Ezetz esan nizun lehen aldiz proposatu zenidanean ere. Ez da egia zalantza erakutsi nizunik. Ez daukat apuntatuta. Ni ez naiz akordatzen. Hau ez da telefonoz esan zenidana. Ez dator nire printzipioekin bat. Esan nizun mezatara ez nuela sartu nahi. Ez dago nire esku. Ez daukazu eskubiderik hori eskatzeko. Ez, nik ez nizun agian baietz esan. Zarena izateak ez dizu honetarako biderik eman. Ez zenidan esan bazkaritan hasi aurretik ere kantatu egin behar zenik. Ez, postura horretan ez. Ez badut nahi, ez dut beti azalpenik eman behar. Ez, ez nago hilerokoarekin. Ez dut hainbeste denbora libre. Ez, ez dut berriro entzun nahi ez zaidala kostatzen.

Eta hala ere, gehienetan baietz esaten dugu. Eta hala ere, zerbait hausten zaigu ezetz esaten dugun aldiro. Eta hala ere, gaizki sentiarazten gaitu ezetz esateak. Eta hala ere, ezetz esaten dugun aldi bakanetan inori inporta behar ez litzaizkiokeen gauzak esplikatzen ditugu. Eta askotan besteak dira arrazoi horien balioa erabakitzen dutenak.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna