Behiala

Bi bertsolariri egin zien dei gai-jartzaileak mikrofonoetara. Bi belaunalditakoak. Gaztea bata, ez hain gaztea bestea. Eta eskatu zien, bakoitzak bere garaiari heldu, eta batak besteari ulertuko ez zituzketen kontuak esateko.Atzean nengoen ni, ez hain gaztea baino belaunaldi bat zaharragoa. Burua martxan jarri zitzaidan. Zer aipa niezaioke nik gazte bati, gure garaian oso ezagun izana eta orain berak nekez ulertuko lukeena? Publizitatean banuen helduleku bat: Qué gustirrini! edo Que te Fagorices erabat arrotz egingo litzaizkioke gazteari. Baita Fanderiako pentsuena ere. Marken norabidea ere har nezakeen: tabakoa, Jean; komuneko papera, Elefante; freskagarria, Schuss. Hor neuzkan zoruko sintasola eta sukalde-armairuen fornika ere...

Baina erabaki nuen gazte batek inoiz ulertuko ez zukeena José Luis Moreno eta ETBren arteko lotura zela. Kontatuko nion Moreno Miramongo egoitzan ibiltzen zela, kokotsa gora eta hortz-mamiak harro erakutsiz. Entre amigos programa ekoiztu eta aurkezten zuela, inguruan lagunak baino etsaiak gehiago zituen tipo hark. Euskara aitzineratzeko sortu eta sei-zazpi urtera horrela zebilela gure telebista publikoa. Ziur nago gazteak ez zukeela deus ulertuko. Baina ez dago gazte izan beharrik hori ez ulertzeko.