Albistea entzun

HITZ ETZANAK

Krispetak

Andoni Egaña -

2021eko urriak 21

Zinema-aretoen jabeak kexu dira. Azken neurrien arabera, ez dago zinema-aretoetan krispetarik jaterik, eta horrek asko mugatzen omen du euren negozioen bideragarritasuna. Langileen erdiak kalean utzi beharko omen dituzte aldi baterako behintzat. Krispetek —jaterik ezak, kasu honetan— aldi baterako enplegu erregulazio gehiago ekarri behar zuela sinestea ere! Sekula egingo ez genukeen lotura bat da krispetak eta lanik ezarena...

Fermin Etxegoien euskaldun kontziente eta inkontzienteez mintzatu zaigu bere Totelak liburuaren aurkezpena dela eta. Inkontziente linguistiko kolektibo bat ba omen dugu, eta oso espainola omen da Hego Euskal Herrian eta oso frantsesa Ipar Euskal Herrian. Bat nator. Euskara batua ikastolan ikasi zuen belaunaldi batekoa naiz. Ikusi dut euskara berritzen, moldatzen, egokitzen... Zabarkeriari mugak jarri, garbizale itsua izan gabe. Egin daiteke. Egin da. Garapena, azpiegiturak, zigarrokina... esaten, gaztelerazko ordaina baino beranduago ikasi genuen, baina natural egin ditugu geure. Gure aitari islada irteten zaio lehen ez bezala...

Baina krispetekin ezin dut. Inpostore sentitzen naiz, beste ni bat, krispetak idatzi edo esaten dudan bakoitzean. Hitza ikasi nuenerako palomitak sustraituegia egongo zen nire garunean.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.