Albistea entzun

BIRA

Ardura

Onintza Enbeita -

2022ko maiatzak 27

Gaur duela sei urte, 2016ko maiatzaren 27an, Barack Obama Hiroshiman izan zen. Oraindik ere gizaterian sinesten duen jende batek barkamen eskaera bat espero zuen. Ez noski zuzenean Obamaren izenean, baina, AEBetako presidentea izaki, bai bertako estatu agintaritzaren izenean. Agintaritza hori izan baitzen, mende erdi lehenago, bonba atomikoa eraikitzea ahalbidetu eta Hiroshiman eta Nagasakin botatzea deliberatu zuena. Kontua da Obamak ez zuela esperotako keinurik agertu: «Lainorik gabeko goiz argi batean, heriotza zerutik erori zen», izan zen esan zuena. Ezin zaio agintari bati poesia egiterik ukatu, baina jakin badakigu bonbak ez direla erortzen: bonbak bota egiten dira. Are: bonbak norbaitek botatzen ditu, eta norbait hori zerbaiten parte izaten da gehienetan. Beraz, bonba atomikoak AEBetako armadak bota zituen, eta gerrarekin zerikusirik ez zeukaten milaka lagun hil zituzten. Gernikarrei euren burua erre zutela esan zieten, eta hiroshimarrei zeruak heriotza bidali ziela goiz argi batean. Eta Ukrainan izan diren kazetari eta medikuak esaten ari zaizkigu bertako armada dela krimenik handienak egiten ari dena, baina informatiboetan errusiarrak baino ez dira gaiztoak. Dakiguna jakinda, hemendik berrogeita hamar urtera berandu izango da arduradunak bilatzeko.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Iruzkinak kargatzen...