EKOGRAFIAK

Larria da

Miren Manias -

2018ko uztailak 4
ETB1ek %1,9ko kuota izan du ekainean; datu txikiena 2017ko urritik. Gure telebista publikoaren arduraduna banintz, kezkatuta egongo nintzateke. Ikusle datu eskasen arrazoietan sakonduko nuke, hobetzeko esparruak identifikatzeko eta erronkei aurre egiteko.

Nire esperientzia da euskaldunok ez dugula zer ikusi ETB1en. Nekatuta nago kirol, meza eta errepikapenez jositako asteburuko programazioaz. Horri erantsi euskarazko kateak dituen saiorik txukunenak —entretenimenduari, informazioari eta dibulgazioari dagokienez— ordutegi miserableetan ematen dituztela: EiTB Kultura Transit, Artefaktua eta Teknopolis tartean. Astegunetan egoera antzekoa da; Gaur Egun informazio eta Ahoz Aho kendu egin berri dute— analisi edo eztabaida saioez harago, aukera gutxi daude. Zaharrak berri udarako ere. Dirudienez, euskarazko saio berri bakarra uda honetan ETB1en Hauxa2 izango da.

Egoera larria da. Larria da euskaldunok ez izatea bermatua askotariko edukien emisio minimorik, euskaraz; larria da gure telebista publikoak ezin ekartzea herritarrak euskarara; eta larriena da, Josu Amezaga EHUko irakasleak dioen bezala, «euskaldun zaharrak, euskaldun berriak eta elebakarrak uxatzen direla hizkuntzatik». Maite Iturbe, EITBko zuzendari nagusi: programazio bera balu, ETB2k audientzia handiagoa lortuko luke ETB1ek baino? Datuak hor daude; Herri txiki, infernu handi umorezko eta Ur Handitan aktualitateko erreportajeen saioak asko estimatzen dira. Dakidan arte, gainera, telebistaz euskal kultura zabaltzeko bide dira.

Gustatuko litzaidake ikustea zenbakietan soilik oinarritzen ez den gogoeta eta erreakzioa ETB1en. Komunikabideek, telebistak barne, balio dutelako komunitate ezberdinek mundua nola ikusten duten erakusteko; kideen arteko harremana lantzeko; lurralde geografikoa identifikatzeko; balio kolektiboak indartzeko; imajinario soziala egituratzeko; eta erreferentzialtasuna sortzeko. Noski, jatorrizko hizkuntzan. Bestela, zaila da euskal gizartea euskarazko ikus-entzunezkoekin identifikatzea zein horiek kontsumitzea.

«Munduari eman diezaiokeguna eta beste inork eman ezin diona euskara da», dio Joxe Azurmendik Eusko Ikaskuntzaren Solasaldiak saioan. Zeren zain zaude, ETB?

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna

Izan zaitez BERRIAlaguna

Irakurtzen ari zaren edukia libre ematen jarraitu nahi dugu. Euskaraz informatzea da gure eginkizuna, zure eskubidea. Sareko irakurlea bazara, konprometitu zaitez irakurtzen ari zarenarekin. Geroa zugan.

Izan zaitez BERRIAlaguna