BIRA

Salaketa

Onintza Enbeita -

2018ko urriak 11
Arnasarik gabe utzi gintuen berriari buelta eman, ahaldundu eta elkartu egin dira: salatu egingo dute bere erreferentzialtasuna erabilita biluzik jarrarazi zituen gizona. Berdin du argazkiak, bideoak edo dena delako aitzakia izan: hainbat neska biluzik jarrarazten saiatu zen bere boterea erabilita. Ez dakit pozak, esperantzak edo zerk eraginda, baina negar egin dut emakume horien guztien argazkia ikusi dudanean, salaketa jarri dutela esanez. Ez diot, hala ere, beste munduko oihartzunik ikusi oraindik sare sozialetan.

Ezker Abertzaleak eta Piratek Varela euren eremuetatik kanporatu zutenean haren izena eskatzen zutenak isilik daude. Ez dakit norbait esanguratsuagoa espero zuten edo ahaldundutako emakumeak ez zaizkien interesatzen edo ni hau idazten ari naizenean oraindik berria ez dakiten. Haiei buruz apenas dakidan ezer, baina emakume horiek guztiek niregan sortu duten indarra handia dena badakit.

Arrazoia daukazue, neskak: ez da hau jasan duzuen lehen erasoa izan, eta zoritxarrez azkena ere ez da izango. Besteok ere ez gaude salbu. Denok makurrarazi gaituzte modu batera edo bestera, eta gero, isilarazi egin nahi izan gaituzte. Baina asko gara, eta beldurra galtzen ari gara zuen moduko neska ahaldunduei esker. Bejondeizuela! Zuetaz eta zuekin harro gaude!

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna