Albistea entzun

HITZ ETZANAK

Ratioa

Andoni Egaña -

2022ko ekainak 23

Umetan, ez genuen ikastolan bider erabiltzen. Zeinua bai; hitza ez. -ko atzizkia erabiltzen genuen biderketak burutzerakoan. Sei seiko, hogeita hamasei. Zazpi lauko, hogeita zortzi. Bi zazpiko, hamalau. Euskararen senetik pare-parera zetorren esamoldea zen. Seina behiko sei multzo, hogeita hamasei behi. Zifrak handitzen hastean sortzen zen arazoa. Berrehun eta berrogeita hamabi, laurogeita hamazazpiko... Ditxosozko -ko biderkatzailea heltzen zenerako zorabiatu egiten zinen esaeran, ulermenean, denean. Eraginkorragoa da, bai, bider hori tartean sartzea. Arnasa handia ematen dio esan behar duenari bezala ulertu behar duenari ere.

Orain, Eusko Jaurlaritzak hezkuntzarako hartu duen erabakia dela tarteko, ratio hitza entzun eta irakurtzen hasi gara edonon. Latinetik heldu bezalaxe azaltzen zaigulako edo, ez du min handiegirik ematen begi-belarrietan. Gainera, ez da erraza ordain egokia aurkitzea. Esango dugu «ume gelako», «alargun herriko» edo «zerbitzari tabernako» baina hitzaren faltan geratuko gara.

Pertsona edadetu batekin ari nintzela, hala bota zidan atzo: «Irratia esaten ikasi guk, eta orain berriz radioa esaten ari dituk. Hau ulertuko duenik ez duk». Entzumenez zebilela juxtu esan ordez, arrazoia eman nion. Total, hitz bera da, ezta?

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Iruzkinak kargatzen...