BIRA

Abizenak

Onintza Enbeita -

2018ko irailak 15
Asko dira etorkizun hobe baten bila Ameriketara joan ziren euskaldunak. Askok ez zuten behar adinako zorterik izan: badakizue, Ameriketan ere txakurrak ortozik. Beste batzuek txin-txin, txin-txin itzuli ziren etxera. Izan dira han galdu direnak ere: ez berririk, ez hileta deirik, ez ezer. Asko, gutunetan kontatzen zutena baino txarrago biziko ziren.

Beste asko, ordea, ondo biziko ziren. Ondo edo lasai behintzat. Edo ez dakit nik. Ez baitakit nola bizi daitekeen norbere herritik milaka kilometrotara halako edo bestelako gerretan sartzen dena. Zer pentsatua ematen didate Ameriketako diktadura militarrei buruzko artikuluetan irakurtzen ditudan abizen euskaldunek. Kezkatu egiten naute bertakoek euren eskubideak aldarrikatzen dituzten bitartean, lur jabeen artean dauden abizen euskaldunek. Askok ez dute ukatzen euren jatorri euskalduna. Badakite, eta hala kontatzen dute, hemendik joan zirela hara euren gurasoak edo gurasoen gurasoak, eta haien izerdiak orain dauden lekuan egoteko zilegitasuna ematen dietela uste dute.

Badakit euskaldun izateak ez duela inor on egiten. Badakit ez daukadala haiekin zerikusirik eta haiek eta nik ez diogula elkarri ezer zor. Baina, hala ere, batzuetan, barru-barruan lotsa moduko sentipen bat pizten zait.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna