BIRA

Gorrotoa

Onintza Enbeita -

2019ko apirilak 9
Ez dut oso ondo ulertzen zer esan nahi duen gorrotoan oinarritutako feminismoaz ari den jendeak. Ez dakit zergatik leporatzen dioten feminismoari gorrotoz jokatzea. Angela Davisek esaten zuen feminismoa dela emakumeak pertsonak garela aldarrikatzen duen ideia erradikala. Ez dakit hor non dagoen gorrotoa.

Matxismoak emakumeak hiltzen ditu, bortxatu egiten ditu, umeak hiltzen ditu emakumeen zoriona izorratzearren, lanetik botatzen ditu haurdun dauden emakumeak, ez du onartzen emakumeek plaza publikoa askatasunez okupa dezaten... eta inork ez du gorrotoarekin lotzen. Tradizioaz, ohiturez, arazo mentalez, ezjakintasunaz eta halako gauzez hitz egiten digute matxismoa eta haren indarkeria zuritzeko.

Feminismoak ez du gizonik hiltzen, ez du gizonik bortxatzen, ez du gizonik lanetik kaleratzen, ez du umerik hiltzen gizonen zoriona izorratzearren, ez du espazio publikoan ari diren gizonen askatasunik mugatzen, ez du inor isilarazten... eta, hala ere, gorrotoa ikusi nahi dute feminismoan.

Historia errepasatuta, pozik egon behar lukete gizonek: mendekua eska genezakeen, eta aukera berdintasuna eskatzen dugu, eskubideak eskatzen ditugu. Eta ez, feminismoa ez da matxismoaren beste muturra, ez da gorrotoa: gure buruari zor diogun maitasuna da.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna