Noiz sortua: 2020-02-07 00:30:00

BIRA

Langile hilak

Onintza Enbeita -

2020ko otsailak 7
Basoko tresneriarekin istripuak izaten dituzte askok, beste batzuk altueretatik erortzen dira behar den moduko ekipamendurik ez dutelako, pisu handiko gauzak erortzen zaizkie gainera, estresak eragindako minbiziak eramaten ditu asko, lanean erabili beharreko produktuek osasuna izorratzen die hainbati... eta horrela hiltzen dira urtero milaka langile (mundu guztian). Zenbaki hutsak dira kapitalarentzat. Ez dakit zer diren gure mundua gobernatzen dutenentzat. Askotan pentsatzen dut agintariek ez dituztela langileen atzean dauden pertsonak ikusi ere egiten, haien begietan ez dela halakorik gertatzen, ez dela langilerik existitu ere egiten. Bitartean, hilean mila euro tristera ez iristeko, ordu piloa egiten du jendeak lanean gogor, inorentzat. Eta lanak duinago egiten gaituela esaten digute esaera zaharrek, eta lanik ez daukana, alferra dela iradokitzen dute esale berriek. Eta atzerritarrek kentzen digutela lana, eta atzerritarrek eramaten dutela gure dirua, eta ez dakit zenbat gezur gehiago.

Bitartean, garabiek erortzen jarraitzen dute, basoko tresneriek huts egiten dute, arnesik gabe eraikuntza lanetan dabiltzanak larri daude... langileak hilda edo hil zorian; edonon. Inork ez ditu ikusi nahi: gure mundua beste aldera begira eraikita dago.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna