HITZ ETZANAK

Argi

Andoni Egaña -

2019ko ekainak 8
Ave Maria Purisima! Jaungoikoak gabon! Deklaratzera noa zer desio dugun, toberak jotzera gatoz bost edo sei lagun». Manuel Lekuonak jasotako hitz horiek datozkit gogora Espainiako Parlamentuko diputatuen diru sarrerak eta ondareak argitaratu dituzten honetan.

Ziur nago nik bezalaxe zuetariko askok arretaz irakurri dituzuela batzuen zein besteen zifra eta gainerakoak. «Deklaratu» egin behar izaten dituzte, argitan jarri, alegia. Barre murritxen batek ere egingo zizuen ihes, aurrezki eta ondasunen artean, halakok ukuilu bat daukala —«korta» idatzi behar nuen zehatzagoa izate aldera— edo beste halako hilobi baten erdiaren jabe dela jakitean —akaso horregatik egingo zuen Zubietako erraustegiaren alde—. Hondo-hondoan, ordea, diputatuetariko askok dena argitara ematen dute ezer argitu gabe. Nola iritsi ziren horra, han daudela zein erabaki eta noren aldekoak hartzen dituzten, eta kargua uztean lehen harturiko erabakien onuradunen babes goxoan bizi ahal izango diren da jakin nahi duguna.

Kontuak kontu, jabetu naiz euskaldunok eskura daukagula gazteleraz gizonezkoen zintzilikarioak zakar aipatuz baino erabiltzen ez den esamolde bat: «Ez niri toberak jotzera etorri!», esango dut aurrerantzean, arrautzak platererako utzita.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna