IRLEN SAREA

Gure komertzioak

Gorka Julio -

2019ko urtarrilak 12
Hirietan zurrumurru bat dena, herrietan errealitate gordin bat da; herriko denda txikiak hiltzen ari dira. Eguberrietako kanpaina pasatu da, eta ez dirudi oso urte oparoa izan denik denda txiki eta ertain askorentzat, Interneteko eta enpresa handiagoen eskaintzak direla medio. Datu askorik gabe, baina handiek ere Interneten eragina nabaritu dutela entzun diot inori. Komertzioa erabat aldatzen ari da, sakelakoari lotuta. Erosotasuna, eskaintza, prezioa... asko dira horretan eragiten duten faktoreak. Gertuko tratua, konfiantza, gomendio pertsonalak... ez dirudite hain garrantzitsuak erosle berrientzat. Homogeneizazio prozesuetan, ezer ezberdina eskaintzea zaila da, publikoa horretara ohituta baitago; merkeago eskainiko dionik bada, zertarako gertu erosi?

Homogeneizazioaren kontra, eskaintza berezitua eta bertakoak egiteko aukera dago beti, baina hori egiteko zailtasunak asko dira. Komunikazioan indar handiagoa jartzea beharrezkoa izaten da, eta txikiek ez dute horretarako aukera handirik.

Interneteko salmentari dagokionez, bertara ere iritsi da marko geografikoari lotutako mugen apurtzea. Europan, orain arte ez bezala, produktuak herrialde ezberdin batean erosteko aukera egongo da orain. Orain arte, zenbait markek herrialdearen araberako filtro bat jartzen zuten. Konektatzen zinen herrialdearen arabera, herrialde horretako dendara bideratzen zintuzten. Orain hori desagertuko da, edo behintzat beste herrialdeetako denda birtual horietan ere erosteko aukera izango duzu Europan.

Ohitura aldaketa, baina, gertatu da. Frikzio humano gutxiko dendak nagusitzen ari dira. Plano fisikoan, tratu pertsonala eskertzen duenik egongo da, baina prozesu gero eta automatizatuagoak nahiago ditugula uste dut. Prezioa ezagutu, produktua ikuskatu eta trabarik gabeko erosketa egitea, alegia. Plano fisikoan horrela bada, zer esan Internet bidezko salmentetan...

Zer gertatuko da gure herri eta hirietako lokalekin orduan? Aukera gutxi ikusten ditut, baina bizitzaz bete beharko ditugu. Dendak bakarrik izango ez diren dendak, tabernak bakarrik ez diren tabernak edo elkartzeko tokiak: behar komunak asetzeko guneak asmatu beharko ditugu. Hori, edo frankiziez eta inmobiliarien kartelez jositako desertuak izango ditugu.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna