Albistea entzun

EKOGRAFIAK

Ezkor kronikoa

Lander Arretxea -

2022ko ekainak 17

Futurofobia. Hala izena du irakurtzen ari naizen saiakera liburuak, eta ez zait euskaratzeko baliokide borobilagorik otu. Gerofobia, beharbada? Hector Garcia Barnesek idatzia da, eta millennial izendatu gintuztenon artean ohikoa den ezkortasunaz dihardu. Antsietatea, ezinegona, daukagun apurra galtzeko beldurra eta hipokondriaren gisako joerak ditugunontzat, astindu galanta da. Ezkortasun horrek ziniko arduragabeak bilakatzen gaituela dio: «Etorkizuna beltza bada, ez badago ezer egiterik, zertarako ahalegindu ezer aldatzen?». Bizirauteko senaren alderik ilunenak ere pizten ditu, muturreko indibidualtasuna eta jarrera kontserbadorea. Iragan oro izan zen urre.

Ez da maketatzailea edo editorea orrialdez okertu. Hau Ekografiak da, pantailetako edukiez jarduteko kritika espazioa, ez liburuak txalotu edo egurtzekoa. Futurofobia-k telebistari buruz makina bat kontu esaten dituelako ekarri dut lerrootara: garaitu beharreko etsai ilun bat irudikatzen zuten fikzioetatik —Star Wars, Indiana Jones...— gizakiaren berezko iluntasuna eta gainbehera saihetsezina erakusten dituzten fikzioetara igaro garela dio —Game of Thrones, Breaking Bad, Handmaid's Tale—; baita ezkor kronikook iluntasun hori ikusiz gozatzen dugula ere. Berdin gertatzen da distopia hori etxeko atariraino sartzen zaigunean —pandemia, Ukrainako gerra, elikagai eskasia...—. Horixe baita pesimistaren elikagairik preziatuena: (ustezko) arrazoia. «Ikusten? Mundua pikutara doa. Esan nizuen nik!».

Asebetetze edo gozamen doilor horren azken adibidea iaz boladako telesaila izan zen Squid Game-n izenpean iritsi zaigu. Distopikoa hura ere. Bigarren denboraldia izango duela jakinarazi berri dute, baina pauso bat harago joango da Netflix plataforma. Lehen denboraldiko proba bortitzak —hildakorik gabe, espero dezagun— birsortuko dituen reality show-a egingo dute. Etsipenak jotako pertsonak jolas makabro bateko pieza bihurtzen zituen telesailak, aberatsak entretenitzeko.

Errealitatean, dibertitzeko asmoz hartuko dute parte zientoka lagunek, borondatezko distopian. Gerofobiak gure eskubideen alde borrokatzeko eta kolektiboki antolatzeko ezgaitzea bada nahikoa tamalgarria, berez. Gainbeheraren protagonista izanez gozatua hartzeak gainditu egiten du, hala ere.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

 ©JAIZKI FONTANEDA / FOKU

«Nire lanbidea artearekin lotzen saiatzen nintzen beti»

Unai Etxenausia

Armestok biltegian gordeta zeuzkan lan batzuk aurkeztu ditu Gasteizko Zas Kultur Espazioan. Marrazkiek «pertsonen arteko komunikazioa eta inkomunikazioa» erakusten dute.
 ©ETB

«Beste gauza batzuk probatu nahi ditut»

Urtzi Urkizu

Igandean, Gurrutxagaren agurra izango da ETB1eko 'Herri txiki, Amerika handi' saioan. Zortzi denboraldiren ondoren, beste aurkezle bat arituko da 'Herri txiki, infernu handi'-n.

Kinka buletina

Klima larrialdiari eta ingurumenari buruzko azken berriak zabaltzen dituen buletina.

Iruzkinak kargatzen...

Izan BERRIAlaguna

Zure babes ekonomikoa ezinbestekoa zaigu euskarazko kazetaritza independente eta kalitatezkoa egiten segitzeko.