Plazerez, agur

Erlazioei eta istorioei agur esatea zaila izaten da beti. Duela gutxi, Sara Torres Lo que hay liburuaren idazleak Ciberlocutorio podcastean hitz egin zuen. Saio horretan lagunak eta bikotekidea uztearen inguruan hitz egiten zuten. Aurkezleen eta gonbidatuaren hausnarketak entzun ostean, bertan aipatzen dituzten hitz horietan asko pentsatu dut azken astean. Adiskidetasuna eta maitasuna kasu batzuetan ez dira betirako, eta erlazio horiek amaitzen direnean, momentu nahiko txarrak izaten ditugu. Torresek amaiera onak izateko proposamena egin zuen podcastean. Amaiera horiei denbora emanez, erlazio horien aldaketei zentzua bilatzeko eta plazera izateko aukera da.

Telebistan, bukaerekin ohituta gaude. Saio baten denboraldia amaitzen denean, hurrengo denboraldia gertatuko den ala ez jakin nahi dugu. Telesailekin berdina gertatzen da. Telesaileko protagonistak faltan sumatzen ditugu gure bizitzan, eta telesaila amaituko dela jakiten denean, jarraitzaileok triste jartzen gara.

Datorren astelehenean Succession (HBO Max) telesailaren amaieraren hasiera iritsiko da. Amaiera hori ezusteko bat izan zen telesaileko aktoreentzat. Aste honetan jakin izan denez, telesaila filmatzen ari ziren bitartean, aktoreek ez zekiten azken denboraldia grabatzen ari zirela. Azken kapituluaren gidoi irakurketan jakin zuten hura izango zela telesailaren azken kapitulua. Sarah Snook aktoreak aitortu du hasiera batean haserretu egin zela albistea jakin zuenean, baina geroago dena ulertu zuen, eta amaierak zentzua zuela adierazi du.

Telesailaren zaleok amaiera ulertzen dugu. Roy familiaren gorabeherak amaitu egin behar dira, eta beren azpijokoak familiaren gainbeherarekin iristea nahi dugu. Azken denboraldiaren trailerrean botere jokoa nork irabazi duen argi dago. Logan Roy familiako buruak negozio guztien buru izaten jarraitzen du, eta bere seme-alabak alde batera utziko dituela dirudi. Gorrotoa, bekaizkeria eta handinahiak protagonisten odolean daude. Familia alde batera uztea zaila izaten da. Roy familiako kideen artean ez dago harreman onik. Beraiek ez diote bata besteari agur esan, baina datozen asteetan pixkanaka agur esango diegu.

Torresek esaten duen bezala, agur horretan plazer pixka bat aurkitzea espero dut.