Marokora itzultzea, giza eskubideen urraketa «larria»

Abuztuaren 22an, 116 migratzailek Ceuta (Espainia) eta Maroko bereizten dituen hesia igaro zuten. Biharamunean, Espainiak Marokora itzuli zituen, bi estatuek 1992an sinatutako akordio bat erabilita. Mugak Zabalduz karabanak gogor salatu du: «giza eskubideen urraketa larriak» direla esan du, mugan bertan egindako itzulketak direlako. Auzitan ipini du Espainiak eta Marokok bete ote dituzten itunak ezartzen dizkien obligazioak. Era berean, Marokok migratzaileei ematen dieten tratu «txarraz» ohartarazi du. Bilbon elkarretaratzea egin zuten atzo, salaketa horrekin bat eginez.