JIRA

Protokoloa

Angel Erro -

2018ko uztailak 17
Soldaduen arma-ikuskatzea protokolozko ekitaldia izaten da. Aurreko astean Ingalaterrako erreginak eta AEBetako presidenteak egindakoak eman du zer esan apurra. Protokolozko kontuetan desbideratzerik txikienak atentzioa ematen du, onerako (humaniza dezake handikia) edo txarrerako (irrigarri utzi). Trumpen eta Windsorren arteko kokapen nahasmen txikiaren errua lehenari egotzi zaio, ohituraz, nahiz eta berez erreginarena (eta guardiaren ofizialarena) izan. Erraza zen tronpatzea. Ez da logikoagoa zakarkeria eta jendetasunik eza jokabide ofizial bilakatu dituenak monarka (adineko) batekin begirunerik gabe jokatzea? Bada esaten duenik horrelako portaera presidente hautetsi duen gizarte zatiarekiko itun erakusgarria dela. Estimatzen diote botere formalarekiko adeigabe jardutea, behe klasearen mendeku gisa.

Hau erabili dut buruan Errusiako Munduko Koparen finalean Macron Frantziako selekzioaren garaipena buruzagien oholtzan nabarmenki ospatzen ikusi dudanean. Garai batean oso lekuz kanpokotzat joko litzatekeen jarrera. Eta hor dugu, nor eta orain gutxi errepublikako presidenteari hika egiteagatik mutiko bati errieta egin diona, hika egiten mundu osoari. Itsustu zaio, baina ez sobera. Bera ere hautesleriari ari zaio.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna