JIRA

Udal igerilekuak

Angel Erro -

2018ko uztailak 21
Demokraziaren lurrina darie udal igerilekuei, kloro eta eguzkitarako kremarenarekin batera. Aire zabaleko igerileku publikoetan egunotan dabiltzan pertsona guztiak ditut aberkide, lodiak zein gihartsuak, gazteak eta zaharrak, eguzkiak belztuak ala elurra bezain zuriak, bai gordinkeriei espantu handiarekin barre egiten dietenak nola liburu itxuraz serioetan murgildurik daudenak. Arrazoi berberagatik, etsai ditut, funtsean jendailarekin ez nahasteagatik (agian bere buruari aitzakia edergarriagoak eman arren), uda osoan udal igerileku bakar batean ere hankarik sartuko ez dutenak, egunen batean, beharbada, adiskide baten urbanizaziokora edo hondartza bakarti batera joatea nahiago dutenak. Gerra deklaratzen diet.

Bizi naizen hirian hogei bat udal igerileku daude eta aurten jakin dut haietako edozeinen abonamendu txartelarekin guztietara sartzeko eskubidea dudala. John Cheeverren Igerilaria ipuinaren protagonistaren irrikak jo nau. Piszinaz piszina ibai zeharkagarria osa dezaket. Piszina pribatuek (Cheeverrek iradokitzen du narrazioan) norberaren etxeraino eramaten dute. Nire erronkak beste nonbaitera bideratuko nau, jakin ez arren norantz. Argi dut, berriz, nondik aldenaraziko.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna