Deigarria da Katalunian erlatiboki zeinen azkar bereganatu duen Esquerra Republicanak lehengo CiUren espazio politikoa. Eta neurri bateraino baita honen ordezkariek ERCrena ere. Deigarria ez ezik, ia sinetsezina ere. Baina gertatu egin da. Ematen du jaidura paktista eta hauturista elkarrekin trukatu dituztela bi espektro politikoek.
Ezker abertzaletasunean ere ordezkapen handi horren guraria sumatzen da tarteka, batez ere Espainiako Kongresuan gobernagarritasuna ahalbidetzeari begira emandako (edo, hobeki, negoziatutako) bermeen bitartez, zeinek ordura arte rol horretan eroso egondako EAJ bere burua nolabait birkokatzera eraman baitute, momentuz behintzat izpiritu pragmatikoa abandonatu gabe baina lehia sinbolikoa indartuta. Horrela interpretatzen dut, aurrekontuak babestearen truke, surf eta pilotako euskal selekzioen ofizialtasuna PSOEri erauzi izana. Ez baita gutxi. Baina ikur.
Gehiago kostatzen zait atzematea, beharbada ez didalako inork behar bezala azaldu, zer dagoen EAJk bere hautagai itxuraz indartsu batzuk (Rementeria, Olano..., orain Urtaran ere) ordezkatzearen atzean. Printzipioz ez dirudi erabaki pragmatikoegia, baina ezta sinbolikoa ere, egia esan. Beste nonbait egon behar dute klabeek.
JIRA
Ordezkapen handia
Iruzkinak
Ez dago iruzkinik
Ordenatu