JIRA

Amodiorik ez

Angel Erro -

2018ko ekainak 30
Gauzak zer diren. Ekainaren 28an, herenegun, hain lanpetuta ibili nintzenez, ahaztu zitzaidan LGTBQ Harrotasun egunari buruzko zutabe nahitaezkoa egitea. Hau diot zertaz mintzo ez zaren esanguratsua izaten baita. Badaezpada. Iritzirik eman ez izanak kanpotiko mezuetara iragazkorragoa egin nau. Ortzadarreko banderaren inflazioak erabilera folklorikoaren susmoa piztu dit. Ikustea besterik ez dago Albiol bezalako eskuindar muturrekoak argazki bat plazaratu duela elkartasunezko mezu batekin. Ez dago telebista saiorik keinu txikiren bat egin gabea. Erakundeak ere batu dira. Batzuk bideo, afixa eta mezu hunkigarriak lau haizeetara zabalduta. Eta nik, jainko agrafo baten gisara, guztia ongi egina zegoela ikusi dut.

Ongi edo. Lelo usuenetako xehetasun batek kirrinka egin dit. Pasatzen utziko nuke, gero eta maizago agertzen den mezu nire ustez ez errugabea ez balitz. «Maite duzuna maite duzula». «Maitatzea ezin baita ilegala izan». Ni inorekin maiteminduta egon aurretik ere gay nintzen. Eta ondoren izanen. Norbait(zu)ekin larrua baino ez badut jo nahi, orduan ez da nire aukera lelogarria? Heteroarauaren binakakotasun sakratu, amodio erromantikoaren mamuarekin kontuz! Ez dadila izan gizarteratuak izatearen ordaina.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna