JIRA

Jaitsigailua

Angel Erro -

2019ko azaroak 7
Descalzos kaleko igogailutik jende tropeltxoa atera da, burumakur. Beti harrigarria da hain toki txikian hainbeste lagun sartu ahal izatea. Estutasunetik aske, baina oraindik larri irteten dira lerroan. Laster ulertu dut larritasunaren zioa. Kutxatik ateratzen azkenetarikoa agure bat da, belaunaldietan zehar Iruñerritik kanpoko odolik gabea ematen duena, jator itxurakoa, Alde Zaharrera emaztearekin buelta bat edo mandatuak egitera doazen horietakoa. Aurreko norbaiti zuzentzen zaio: «Todos los extranjeros lleváis en la cabeza eso. Parecéis...». Jendea sakabanatzen doa.

Ez nintzen ohartua lehenago ateratakoen artean zapidunik zegoen. Ez dit arreta handirik deitzen, gutxiago langileen auzo batetik etorrita. Igogailuan igo naiz beste gizon adintsu batekin batera. Isilik goaz behera. Bestea ez dakit, ni lotsatuta. Ultraeskuinaren presentzia mediatikoa ez da inoiz alferrikakoa. Nork uste izanen zuen Iruñerriko agure ertain prototipiko bat etorkinak jazartzen lotsagabetuko zenik?

Behean, igogailuaren zain, haur eskola bateko ume ilara koloretsua. Euskaraz ari dira. Beste gizonak, andaluziar azentuarekin, zoriondu ditu andereñoak hain ongi hezita izateagatik. Bihotza zertxobait altxatuago sentitu naiz une batez.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna