Albistea entzun

JIRA

Eskisito normalak

Angel Erro -

2022ko urtarrilak 21

Zer gertatzen zaie euskal hiriburuetako alkateei? Tira, oraingoz ez guztiok, baina haietako bik aski adierazpen bitxiak, nolabait esateko, egin dituzte. Iruñekoaz dagoeneko aritu gara hemen behin baino gehiagotan. Jende normalaren alkatetzat aldarrikatu du bere burua aspaldian, normaltasun hori zertan datzan zehaztu gabe. Horren ordez, pixkanaka aztarnak ematen doakigu. Azken arrastoa, denok entzunen zenutenez, ematen du «kanpoan jaiotakoa» ez izatea dela, hemen ez jaiotakoak omen direlako Iruñean egiten diren ia delitu guztien egileak. Jende normala hemengoa da, bizitza osokoa. Hemen (zehaztu behar dugu hemen non den?) jaiotakoek, delituak ere, delitu normalak egiten dituzte, estatistiketan nabarmentzen ez direnak eta inor (jende normala, alegia) asaldatzen ez dutenak.

Donostian, berriz, jende normala gabe, jendea eskisitoa omen da, pinpirin eta milika. Jende eskisitoa aski insolidarioa ei da, traban ibiltzea maite du hiriaren airbnbizazioan laguntzeko prest ez daudelako. Beren betiko auzoan zahartzea amets dute, pentsa, aborigenen toki naturala aldirietako erreserbak direla, kanpoaldea, iruñeraz diogunez.

Orain, honi segika, argitu beharko nuke jende normala eskisitoa ere ote den.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Iruzkinak kargatzen...