IRLEN SAREA

Ohitura osasuntsuak

Gorka Julio -

2018ko irailak 8
Kirola egitea edo osasuntsu jatea ohitura onak diren arren, helburua lortzeko datu bidezko kontrol teknologiko gehiegizkoak helburua bera ahaztera ekar dezake.

Gaztetxoen elkarteko aka Club Juvenileko kamiseta zaharra, galtza motzak eta zapatila zaharrenak hartu eta korri egiteko garaiak pasa ziren aspaldi. Derrigorrezkoa da Decathlonen erositako uniformea eta zapatila fluoreszenteei gailu teknologikoak gehitzea; horrek bihurtzen zaitu runner beste ezerk baino gehiago. Berdin, igeriketa edo oinez egin nahi baduzu ere, askok, gehiegitan begiratzen diogu gure gailuek, sakelakoek edo eskumuturrekoek ematen dizkiguten datuei, helburu bihurtzeraino. Marka gainditu, derrigorrezko 10.000 pausoak egin, X kaloria erre...

Nik erabaki dut ez ez dizkiodala datuak emango eskumuturra saldu zidanari. Kasu gehiegirik ez egitea ere erabaki dut, garai batean garrantzitsuagoa zena, informazio bat gehiago bihurtuz. Ez naiz kirolari profesionala ez eta okasionala ere, baina jabe naiz norbaitentzat datuek izan dezaketen interesaz. Datu horiek guztiak baturik gailuen datuen benetako jabeek izan dezaketen informazioak larritzen nau.

Kirolari lotutakoak ez ezik, osasunaren inguruko datuak dira —gure bizitzarekin harreman zuzenena dutenak— enpresa teknologikoentzako helburu nagusi. Ez da kasualitatea azken eguneraketarekin batera, Google Android gailuetako Fit aplikazioan hain erasokor aritzea gure datu eskean. Datu horiei esker, norbanakoen biziraupenaren estimazioak ez ezik, jendartearen norabidea «iragartzeko» modeloak diseinatzeko baliatu baitaitezke.

Politika publikoak egiteko ere balioko lukete, baina gutxi dira, jendartearen gaineko kontrol gehiago eskuratzeko estrategia bati loturik egon gabe ongizate hutsagatik egingo luketenak. Aldiz, ez dut imajinatu nahi, zer gertatuko litzatekeen osasun publikoak DKV aseguru enpresa pribatuaren bidea hartuko balu. Sortu duen sakelako app baten bidez «ohitura osasuntsuak» dituztela demostratzen dituztenentzat aseguruak merkeago edo garestiago eskaintzen ditu orain; hau da, bere arrisku kalkulurako datuak oparitzen dizkionarentzat bakarrik. Ohitura osasuntsuak izatea teknologiaren erabilera derrigorrezkotik pasatu beharko balu bezala, hemen ere.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna