JIRA

Aditu taldea

Angel Erro -

2018ko irailak 13
Auzokideen bileran ez gara ados jartzen eta burutazioa izan dut etxe bakoitzak aditu bat izenda zezakeela geure ordez batu eta akorduetara iristeko. Epe zentzudun baten barruan ondorioak aurkeztuko dizkigute eta guk orduan ikusiko dugu onartu ala ez. Bizikidetzaren aldeko apustu irmoa, batez ere kontrako bozka ematen dudan bakarretarikoa ni naizela aintzat hartuta, auzokide askoren agurrak galduz apurka-apurka.

Oraindik ez dut inorekin honetaz hitz egin, ez baitut nahi ni ordezkatzeko aukeratu dudan aditua beste inork lehenago hartzerik. Jaime Ignacio del Burgoren baiezkoa errazago ziurtatzeko, bozkagai dugun igogailua paratzeko proiektua ETAren eraberritze arkitektoniko moduko bat dela iradokiko diot, beste hitz batzuekin, noski, adituen bileran esaldia berak jaurtitzeko ohore eta plazeraz ez gabetzeagatik. Euskal Herria eta Euskadi nazio gisa (eta bestela ere) sekulan existitu ez direla (non eta EAEri estatutu berria idazteko batzordean) esan duen modu berean, espero dut auzokideei ere (edo auzokideen adituei) azal diezaien geure ezkaratza ere (edo goiko solairu parea behintzat) ez dela sekula existitu eta, horregatik, orain arte bezala jarrai dezakegula eskaileretan gora oinez.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna