Balkonerria

Aberri Egunerako, etxeko balkoi edo leihoan ikurrina edo/eta nafar bandera zintzilikatzeko deia zabaldu dute. Neure buruari galdetu diot noraino izanen den ohikoa etxean bandera bat, zure herrialdekoa edo beste edozein, edukitzea; populazioaren zer portzentajek ez duen etxean ikurrinik. Haiek ekoitzi eta saltzea funtsezko zerbitzutzat joko dute? Dendetan izanen dituzte? Edo maskaren moduko eskasia dago? Ez du inork aho-estalki ikurrindunak merkaturatzea pentsatu? Garaiz iritsiko ziren?

Lagun batek bisitatzen dituen herri guztietako bandera erosi ohi du. Euskalduna da, baina ez dakit hemengorik ere baduen. Nik uste nuen etxean ez nuela bandera bakar bat ere (eta harrotasun arraro bat sentitzen hasia nintzen), baina bikotekideak gezurtatu dit: gay bandera badugu (orain harrotasun arruntagoa dut sentitzen). «Jarriko dugu?», galdetu dit. «Hobe ez, kontrakarrean paratzen ditugula irudi lezake». «Bestela, Mikel Laboaren Txoria txori abestera atera gaitezke, hori ere badago deialdi berean edo antzeko beste batean». «Eta Esnekiak gogoko ditut abestuko bagenu guk, Yogurinha Borovarena?» «Baina ez duzu esan ez kontrajartzeko...?».

Bihar Eroskin begiratuko dut ikurrinik saltzen duten, badaezpada, esnekien sailean.