Kubak ditu kateak

Nafarroaren askatasunik ezari Fermin Balentziak eskaini kanta ezagunaren letra etorri zait burura Kubaz idazterakoan. Badakizue, «Navarra tiene cadenas por adentro y por afuera». Bilatu dut euskarazko bertsiorik ote duen, eta nire harridurarako, bai, badu eta ez du Chill Mafiak egin!: «Nafarroak ditu kateak kanpoan eta barnean». Gero, jakina denez, abestiak jarraitzen du azalduta armarriko kateak direla geureak eta kanpokoak bortxaz jarritakoak.

Kubaz ere, bertako egoeraz, nekez hitz egin daiteke (nahiz eta maiz ikusten dugun halakorik) bortxaz jarritako kate horiek aintzat hartu gabe, Estatu Batuek Kubari 60 urtez ezarritako blokeo komertzial, ekonomiko eta finantzarioa aipatu gabe. Joe Biden, kasu, nola ausartu daiteke Kubari eskatzeko herriari entzun eta beharrei begiratzeko, inori entzun eta inoren beharrei begiratu gabe blokeo gizagabeari eusten dion bitartean?

Baina hala aitortzeak ez gintuen eraman beharko barneko kateak ere egon badaudela ez onartzera, eta horixek egon daitezkeela azken egunotako protesten oinarrian, protesta horien zati batean behintzat. Poetak esan bezala, «batak ez du bestea kentzen; ez lortuak amestua ez ikasiak huts egite». Horietaz kubatarrek baino ez lukete esku hartzerik.