JIRA
Aditz sorta
Frantziako Gobernuak immigrazioa «kudeatzeko» hogei neurri aurkeztu zituen herenegun (besteak beste, etorkinen mugimenduak kontrolatzeko, herrialdean sartzeko bisak murrizteko, asiloa eskatzen dutenen estaldura medikoa mugatzeko; alor semantiko errepresiboa aditzetik hasita: kontrolatu, murriztu, mugatu). Turingia herrialdean AfD ultraeskuindarrak Angela Merkelen CDU alderdia gainditu du eta horrek krisia eragin du: haiekin itunetara iritsi, osasun-lerroari eutsi ala politika migratorio oraindik gogorragoa agertzea aztertzera eraman omen du. Espainian Vox alderdiak bakarrik dauden adingabe atzerritarren kontrako kanpaina abiarazi du, despertsonalizaziotik hasita (gaztelaniazko MENA siglak orokortu eta kriminalizatuz), eta egoera horretan dauden hiru nerabe jipoitu zituzten herenegun Madrilgo auzo batean, eta beste bat Zaragozan. Nola zen hori? «Batzuek jomugak zehazten dituzte eta beste batzuek burutzen dituzte erasoak»? Sinestezinera ohitzen hasita gaude. Nora eramanen gaituzten ongi dakigun neurri sorta agertzen ikusten hasi gara, amesgaizto batean bezala, hurrena zer datorren disimulatu gabe. Markoa aldatu digute, ia oharkabean, ia gure isilean. Iragartzen duten neurri gehienek aditz beldurgarria dute.
Iruzkinak
Ez dago iruzkinik
Ordenatu